(و- ب -أ) وكالة باربو للأنباء- تونس : ذكرت مصادر مأذونة أن لجنة تصفية الدوسيات متع المترشحين لجائزة نوبل للسلام ستضم للقائمة أحد كوادر حركة الخالايق المندفعين. المترشح هو السيد علي شوويرب شهر علي شوورب أمين عام الحركة. و جاء هذا الترشيح بعد التضحيات الجسام التي قدمها الرجل لتونس في عهد الاستعمار كذلك لخلقه لمفهوم جديد للإستفصال بحيث سارت على أفكاره كبار الباندية من الجيل الجديد.
يجدر الذكر أن سيفي (CV) متع علي تضمن أكثر من 1500 ربطية و عركة و هو عدد يخول له الترشيح للجائزة...و لربما سيكون منافس قوي : لوحيد ولد جرومة ،القذافي ملك الموت ،الأسد ولد حليمة، باعث القناة شكراً، خميس بوبطان روما، العربي نتنياهو، شاكالا ولد بوش ،كريستيانو ولد اللبة...و القائمة تطول.
بدورها عبرت حركة الخالايق المندفعين عن شديد فرحتها لهذا الترشيح لما يتمتع به عضوها الموقر علي البجاوي أو علي شورب، من حسن أخلاق إلى جانب تفانيه في تأدية واجبه كباندي أول في تونس.
يقول علي شوورب : لا تسيروا على نهجي و لا تتأثروا بي فأنا لم أجد من ينصحني و يأخذ بيدي،اعرف أن سلوكي مستهجن و مرفوض ولكن
.للتذكير : سمي علي شوورب كما هو لأن شواربو كبيرة و كشاكشو خارجة من فمو
...نجم نكون صحيح ما كانش راهم غلطوني في علي شوورب و برى عاد اش يفضها معاه
شعار حركة الخالايق المندفعين : معانا تستفصل على قاعدة
وأخيراً بعد كر و فر... و أخذ و رد... و تدخلات من بعض الأكتاف المندسة في الداخلية...تحصلت حركة الخالايق المندفعين على الفيزا لممارسة نشاطها في الخنن السياسي. لتصبح بذلك حزب سياسي مرخص له و رقمو 119. أهوكا من توا الحزب ماسوني (ماص هوني) للطولة و جميع أعضاءو متنورين و كلهم عندهم زوز عينين... وحدة ترى كل شي و لوخرى متفغم شي.... العمى الكلي.
مؤسس الحزب هو العبد و للاه بابا عزيزي 2.0...ولي نراهن فيه على الطاقات المتجددة من خيرة الفصايل الشباب...عمدة البلاد على راي أحمد فريعة.
الحركة رغم حداثة تأسيسها، إلا أنها الوحيدة إلي برنامجها واضح : السياسي، الإقتصادي، الثقافي، الرياضي وحتى الماسوني (الماص هوني) ...إلا أننا لا ننتوي الترشح لإنتخابات المجلس التفصيصي لما فيه حسب رأينا من تمكميك بين الأعضاء على راي سي طارق المكي. و عليه نحن ضد كل ماهو فيه مس من مكاسب دستور 1959...ولي حقق فيه الخليقة انجازات في ميدان الركاكة و استفصال و غير مستعدين بأي شكل باش نتنازلوا على هذه المكاسب.
خلاصة القول ننادي بتنقيح الدستور موش إعادة تخييطو على قياس العباد...ما يستحقش عطفة الدستور.
بصيفتي مؤسس الحزب، باش نستعرض عليكم الأعضاء المكرمين من خيرة إنتاج تونس للإستفصال :
بابا عزيزي 2.0...باعث الحركة
علي شورب : أمين عام للحركة
توتو رينا : ممول أول للحركة
زامورانو شم و طيش : مسؤول على القعدات
بية الذيبة : أمينة مال كرافة
و توا باش نعطيكم أسماء حكومة " تكنوخباط " إلي باش تتشكل دوم ما ناخذوا الكرسي :
بابا عزيزي 2.0 : رئيس دولة
العربي غصرة : وزير حرب وخبير عسكري إستراتيجي و مسؤول أول على عسل الفرززو
علي شورب : نائب رئيس و مسؤول أول على الشلاغم ذبانة
خميس بوبطان : وزير الاعلام و مكلف بالرقابة...بوبطان 404
أحمد لونيس : وزير خارجية ومسؤول أول على الخروج على النص
...وزير الشؤون الدينية وبش يعلمنا الدين على قاعدة
بية الذيبة : وزيرة المرأة و مسؤولة أولى على الخيوبية في تونس
جيغ صو : وزير داخلية و مسؤول أول على السوسيسان
عصام جمعة : وزير الرياضة و مسؤول أول على التوكويك في تونس
قردة : وزير التخطيط و مسؤول أول على تدخيل البلاد في حيط
دون دالي : منسق أول للعلاقات الماسونية و مستشار مسمار لدى رئيس الجمهورية
و توا باش نحكي على برامجنا و باش نسترسلها وحدة تلوا الاخرى و الله مستعان.
البرنامج السياسي : بنسبة للسياسة، نحبوا على نظام نصف رئاسي...نضمن فيه إنتقال السلطة بين الخالايق في إطار استفصالي بحت و بدون إقصاء أي كفاءة قادرة على إعطاء لمسة متع علي شوورب في الاستفصال السياسي. و نعد المقترعين بأننا لسنا من هواة التوريث لكننا من هواة الرئاسة مدى الحياة. كما نضمن حرية الصحافة أما كان على اخرين موش علينا...بنسبة للقضاء باهي باهي... أتااااااوووو نحكيوا فيه الموضوع.
بنسبة للعلاقات الخارجية، بحكم إنا حزب ماسوني (ماص هوني) علاقتنا متركزة على المتنورين و فصايل العالم المندفعيين. بما فيهم مثال العم صام . كذلك المثال العربي القطري ولي جايبنيها شماغات بيضا تلالش و دوبل زيرو فوق كرايمهم...وهوما الشيخة موزة تحكم بأحكامها. بنسبة لموقفنا من القذافي...نعلن رسمياً استعدادنا لإستقباله حياً أو ميتاً...نحبو نعملوا عليه قعدة تفريكية.
البرنامج الاقتصادي : ناوين نقسموا البلاد إلى مجموعة فوصيلات. معناها الشمال فصل و الوسط فصل و الجنوب فصل. كل فصل عندو القرار بيدو و يتصرف في الفلوس كيما يحب أما لازم يراعي مصالح الشعب و خاصةً الخالايق. و خلافاً للعهد البائد...ماناش باش نعملوا الشعب ( جمع شعبة ) أما باش نحدثوا على بركة الله ما يعبر عنه "بالقعدات" ما فماش علاش باش نزيد نفسر أكثر...مفهومة يضهرلي.
في التشغيل، برنامجنا يتلخص في جملة : أرقصوا وافرحوا وغنوا...
في السياحة، عجبتنا ياسر فكرة حزب التحرير (رافع راية الإسلام الأوحد). الفكرة ياسر ثورية و ياسر اش باش يقول فمي...يحرز راجل كبير عيب كان باش نخرج كلمة زايدة. الحاصل هل متحررين، سواحهم يحبوهم كان من الاخون المسلمين، نحنا سواحنا... الفاغابونات الأجانب القادرين على خلاها.
البرنامج الاجتماعي و الثقافي و الرياضي : نركزوا ياسر على العدالة الاجتماعية و حق الخليقة في الاستفصال و تنتهي إستفصالتو عندما تبدأ إستفصالة الأخر...بحيث كل فاغابون يلتزم بما يقيده القانون و لامجال لتفريق بن فصالة أو أخرى و بذلك نحققوا العدالة الاجتماعية.
أما في الثقافة، فما كان المزود يخبط و الرقص على طار بوفلس...بحيث مجموعة أغنياتنا الرسمية : ما بين الوديان دمي يقطر، عشية جمعة، احنا ولاد عروش و يا مولى لوتيل سربي خوك و هات.
في المسرح ماعناش ريق معاه لكننا تاو نجيبوا جماعة مل برى يتلهوولنا بيه.السينما، ماعنا ما نبدلو ديجا جوو باهي عل اخر من عصفور سطح...إلى عرس الذيب مع الذهبي.
في الرياضة، باش نشجعوا على التكوير في التراب كان لزم على القزاز و الملاعبية لازم يكونوا حفايا باش يحركوا المخاريق متاعهم ( جمع مخروقة )...لعل وعسى تنتقل كرتنا من الرابطة المنحرفة المحترفة إلى...الرابطة المنحرفة المتربية. ديسولاج بنسبة للرياضات الاخرى، ما نستعرفوش بيهم.
في الختام، نحب نتوجه بكلمة للشعب التونسي نقلوا راهو زادة حتى أنا باش نتكلم بأسمو، الأحزاب لخرى موش خير مني... كابيشي.
كما تعد حركة الخلايق المندفعين بالأمن و الأمان يحيى هنا الانسان...الفايدة يصوتولنا، قايمتنا لونها مبردح على خلاف الأحزاب الاخرى.
كلمة إجلال و إكبار نوجها للجميع الخالايق إلي لباوا الواجب و قدموا تضحيات جسام حتى مايركبوش على الثورة.
لتحيا تونس... لتحيا الجمهورية ... والسلام عليكم ورحمة الله وبركاته
نجم نكون صحيح ما كانش راهم غلطوني و لا انسحبت من الميثاق الجمهوري كيما برشة عباد...
سؤال يطرحه القذافي : ما الفرق بين التمساح و ليس التماسيح ؟؟؟
تدوينة المرة هاذي ماهاش طويلة و ماهاش قصيرة...ماهاش ماصطة و ماهاش مقتلة ظحك...التدوينة متع المرة هاذي، بابا عزيزي حبها تصاور أكثر منها كلام خاطر الشخصية إلي نحكيوا عليها...لاهي مهمة و لاهي محقورة...لاهي باهية و لاهي ساقطة...لاهي خبيثة و لاهي تكركيرة...لحكاية و مافيها إلي أنا ليوم باش نحط تصاور و نعلق عليهم...تصويرة تصويرة...عفسة عفسة...تبهيمة تبهيمة.
شخصية اليوم هي "الله و معمر و ليبيا و بس"، "يا معمر اعطينا إشارة نجيبولك الجرذان في شكارة"...باز عرفتوه توا : معمر الخرباشي...إلي يحب يعرف عليه أكثر ينزل هنا أما راهو بالرومي.
ملاحظة : نخير نستعمل إسم الخرباشي في عوذ القذافي...أكثر كلاس.
التركيز ثم التركيز...باش نبدى توا انبر :
الخرباشي... اليد الفارغة أو...تخرالوفيتش
الخرباشي... مسكوكة أو لا تكون
الراجل يطلع الخرباشي وين يخزر ؟
خشمو كي خشم بوه
دستور الخرباشي : الشعب يحكم نفسه
سامحوني غلطت...هذا خميس بوبطان
شكلاطة... أوما تبر
خيانة مشروعة...مع حجامة لهلوبة
برحمة الحاج...شنية هذا ؟
ولدي أغلى ماعندي...قتلوه الجرذان
الشعب من كثرة ما يحب الخرباشي...و لا يلبس كيفو سيري كاسارونا
الصالون المغاربي...لفنون الزربية و الغرزة التقليدية
الشعب يريد الخرباشي...تكركيرة ليه
إنت و إنت و إنت...جيبوا الأولياء متاعكم
الخرباشي في وضعية...الجبري إلي يعمل في قهوة في ميامي- البحيرة
نجم نكون صحيح مكانش راهم غلطوني و لا راني قذفت قذفة ممتازة نحو المرمى...
هاذي الكلها أسامي نجموا نطلقوها على مجلسنا الموقر إلي باش يتلهالنا بالمرحلة القادمة متع تونس. حبيت نحط لاسامي مخلطينن و ماهمش منظمين بين الباهي و الخايب، باش ماتقولش راهو بابا عزيزي ضد المجلس هذا... لحكاية و مافيها إلي رايي فيه... لاهو لاهو...
في لمحة تاريخية على المجلس التأسيسي، نرقاو إلي : وقع انتخاب أعضاء المجلس القومي التأسيسي يوم 25 مارس 1956 و قد فازت الجبهة القومية بكل المقاعد برئاسة الحزب الحر الدستوري الجديد و مشاركة المنظمات الوطنية المتحالفة معه (الاتحاد التونسي للشغل، الاتحاد التونسي للصناعة والتجارة، الاتحاد القومي للفلاحين الذي تمّ تأسيسه في 2 ديسمبر1955... تولى المجلس القومي التأسيسي طيلة عام و عشرة أشهر وضع دستور في إطار النظام الجمهوري صادق عليه نواب المجلس في قراءات ثلاث خلال الفترة من الخميس 30 جانفي1958 إلى الخميس 25 ماي1959، استغرقت ست عشرة جلسة...والباقي تعرفوه...
كم أنت كبير يا أبن الخضراء " بابا عزيزي 2.0 " حتى المجلس التأسيسي عندك ما تقول فيه؟ أي نعم أول مجلس تأسيسي تعمل كان عمري وقتها 30 سنه و هذاكا علاش نجم نحكي. مانيش محامي كيما سي الباجي قايد السبسي و لا قاضي كيما سي فرحات الراجحي...أما باش نعطي رايي في الموضوع بكل صراحة و بنظرة سياسية بحتة.
في العفسات متع المرة هذي باش نطرق لزوز نقاط مربوطة بالمجلس التأسيسي و حول مهمتو لولا : إلي هي تحرير دستور جديد.
الرجاء تلهاوا بي :
العفسة لولا :أهم حاجة في دستور الجديد هي الفصل الأول إلي يقول :" تونس دولة حرةمستقلة ذات سيادة، الإسلام دينها والعربية لغتها و الجمهورية نظامها".
ها الفصل كثر عليه الكلام، كثر عليه زادة الخلاف في حين هو حاجة مسلمة. مع كل احتراماتي للناس إلي تحب تبدلوا نقلهم من الناحية القانونية ما تنجمش خاطر على هذا الأساس تونس استقلت. و من النحاية الثانية، ما ينكر في اصلو كان الكلب حاشى إلي ما يستاهلش.
النقطة الثانية صار خلاف بين إلي يسميوا رواحهم " اسلاميين " والجبهة لخرى إلي تسمي روحها " الائكيين ". ساعة أول حاجة كلمة " اسلاميين " نقعد باهت كيفاش لتوى لعباد الكل مازالت تحكي بيها في حين هي كلمة أصلها عمك صام و لي بيها يحب يرد المسلمين الكل تنظيم قاعدة متع بن لادن. أما كلمة " الائكية " تقصد فصل الدين على السياسة و تاقف غادي و لي يقول غير هذا راهو منسلخ و موش فاهم شي. أنا نفضل كلمة تونسي خير منهم الزوز. مسلم ،مسيحي و لا يهودي كلنا توانسة.
توا باش نرجع للفصل الأول باش نفسرو بالحروف...اش باش نعمل مادام لعباد ضاهر فيها عمرها ما دخلت مكتب و طلعوا من جماعة محو الامية.
برنامج محو الأمية : بابٌ...بقرٌ
"تونس دولة حرة مستقلة ذات سيادة، الإسلام دينها و العربية لغتها و الجمهورية نظامها". حرف الهاء إلي تعاود برشة في الجملة، يعود على ضمير متع تونس أش معناها الكلام هذا ؟ معناها الإسلام دين تونس وحدها موش الأشخاص...الفصل ما قالش الإسلام دينها و دين جميع المواطنين...مل اخر كل حد حر في ديانتو أما تونس كبلاد راهي مسلمة بسيف على الجميع.
أنا بالتحليل هذا مسحت شوارب إلي يسميوا رواحهم اسلاميين و لائكيين...أون بليس، حجمتلهم. خاطر إلي عندو مخ يقرا مليح قبل ما يبدا يعيط. الله يرحم فم اردوغان "إلي يدعي سي راشد الغنوشي يشبهلو في تخمامو" :" نريد حريات دينية...وليس دولة دينية"
وهنا يوفى تحليلي للموضوع خطرني وصلت للمرحلة إلي فيها وليت نفهم بالقمع إلي نصبوا بيه الزيت.
العفسة الثانية : يبدا التصليح من الفصل الثاني. علاش قلت كلمة تصليح خاطر لعباد ماشي في مخها إلي بالحق باش يتعمل دستور جديد من مرحلة الصفر. الحقيقة غير هذا و هذا رايي البسيط. على خاطر كان باش تعمل فيترينا جديدة ،كيما إلي عندي في الحانوت متع البسيسة، تنجم تعاود ترجع الحنوشة إلي باش يبربشوا الدستور... عباد كيما الحبيب بورقيبة و لا زين المبربشين.
لحكاية و مافيها إلي الأعضاء المنتخبين باش يبداوا خدمتهم بتصليح الثغرات الكل إلي تعملت في دستور 1959...ثغرة ثغرة، غلطة غلطة، تبربيشة تبربيشة. الغاية من الشي هذا نبدوا من باز صحيحة إلي هي الإستقلال...و منها نراجعو رواحنا في إلي غلطنا فيه وخلينا لعباد تركب علينا...قبل كنا نمشيوا على أربعة ساقين توا لازمنا نمشيوا كان على زوز باش حد ما يركب.
إلي ينادي بجمهورية ثانية أخرى، راهو انسان سامحني فيه. على خاطرو نكر في حاجة اسمها تونس و عيب نعطيوها إسم جديد غير إلي عندها. تونس تبقى جمهورية أولى و ماهاش باش تولي في الحالات الكل جمهورية ثانية.
ملاحظة أخيرة : المجلس التأسيسي، ما يلزمش فيه أغلبية مطلقة. هذا فيه خطر على بلادنا و ينجم إلي يتمتع بهل الأغلبية يزيد يرجعنا بتوالي و يعملنا دستور على قياسو...
انشالله المجلس التفصيصي...نقصد التأسيسي ما يبارولناش
في ختام التحليل ، رايي في المجلس التأسيسي بيه وعليه، لأني أنا ضد جمهورية ثانية أما مع التصليح على العظم في عوذ التكسير على العظم. على خاطر موش كل شي خايب في بلادنا...تونس باهية أما إلي حكموها خايبين و سراقة.
أمنيتي... توا تصير الإنتخابات في وقت إلي باش تتفق عليه الناس الكل. تاريخ 24 جويلية ماهوش حياة أو موت مافيها باس كان يتأجل باش نضمنوا " التبلفيط لا ".
نجم نكون صحيح ما كانش راهم غلطوني ولا خذيت بلاصة في المجلس التأسيسي...
تبعت خطاب بن يمين نتنياهو كلمة كلمة...كنت في بالي بش نكتب حاجة على الموضوع هذا مبعد بدلت رايي و قتلي بدلت قناة باعث القناة. أول مرة نجمت نفوت درج منغير ما نزابي و نحط روتانا سياسة. البرنامج إلي شدني ليه اسمو كان صدقني ربي : حوار في العمق... و لا في الصميم... نسيت.
الضيوف على غير العادة، ضيوف مثيرين للجدل : سي طارق المكي و سي عبد الوهاب الهاني (هاني عل الاخر ) زعيم حزب المجد و التمجيد.
عندي مديدة ملي بديت نتبع في طارق المكي، و عندي مدة زادة ملي بديت نبدل في فكرتي عليه. باش ما نكذبش كنت قبل نبخر بريحتو. تفرجت في الفيديوات متاعوا للي خرجوا من خشمي. كنت نقول ديمة شبيه السيد هذا من عام 2008 و هو مارجنا و قلت زادة باز على خاطر مقصوه الطرابلسية. هاذاك علاش هو واحل مع تونس. قبل الثورة كنت نسميه إنتهازي و بعد 14 جانفي راكب على الثورة. أما الفترة إلي "بعد بعد" الثورة عطاتني وجه اخر شنوة هو ؟ طارق المكي هو من القلايل إلي برسمي تقول عليه سياسي. برشة عباد باش تتصدم ملي قاعد نقول فيه أما نتحدى أي واحد ينجم يقول غير الكلام هذا وسيرتو بعد ما نبدا التحليل...
قبل ما نبدا بالعفسات، سي عبد الوهاب الهاني كي خذا الكلمة دشنها بفازا ركيكة ماعجبتنيش...قال : سي الباجي قايد السبسي عمرو 85 سنة و ماعاتش يقدر على سياسة قال شنوة هرمنا هرمنا....بفففف. كاينو سبني أنا شخصياً، أنا بيدي عمري 85 سنة، و مع كل احتراماتي ليه سي عبد الوهاب الهاني، العمر هذا هو عمر النضج السياسي معناها مل الاخر نقص مل بلا بلا...BlaBla
باش نبدا توا بالعفسات، شوية تركيز و شوية تعقل :
العفسة لولا : سي عبد الوهاب الهاني...ممم ،حاسيلو أنا خلطت على كلمة طارق المكي إلي حكى فيها على الاحزاب. المكي حكى كلام في بلاصتو، و خلاني نخمم في الأمور بمنظور اخر. بعد دكتاتورية زين الدكاترة و دكتاتورية الشعب "نقصد فيلي يراوا في رواحهم زعماء مزعومين"، جات دكتاتورية أخرى اسمها : خاطر زين المضطهدين اضطهدني...عندي ألحق نحكي بإسم الشعب. خلاصة المداخلة الأولى متع طارق المكي :
يا احزاب الهانة و الغلبة ماكم تحبوا تخدموا سياسة ؟ يا أخي وضحوا تاريخكم ساعة قبل كل شي. عملية ذكية متاع راميان معنى على عبد الوهاب الهاني برشة...
و لا و أني ما نحبش برشة نجبد تاريخ العباد أما مافيها باس نذكر الناس بشوية حاجات. إلى الأمام... فيديو فيديو :
يا هاني برشة...مل الحقوقي للسياسي...صعيب ياسر يكونوا غلطوك
رد عبد الوهاب الهاني برشة على إلي قالو في الفيديو حاجة تضحك بالحق. قالك نحنا ( يقصد في روحو وأنصار حزب المجد و التمجيد) كي كنا حقوقيين، كنا مطالبين كان بتحليل خطاب زين الخطباء منغير مانمسوا من الهيبة متاعوا. هاو مرة أخرى عمل فازا ركيكة. قال شنوة هو محلل فني معناها يحب ياخو بلاصة بابا عزيزي 2.0 : المحلل الحصري على الواب. يا جماعة الأحد الرياضي، رقيتلكم شكون خير من خالد حسني هاو سي عبد الوهاب الهاني برشة. شبيك راهو عجبتو فازت زين المغلطين كي قال راهم غلطوني...زح صدقها برسمي ؟ و لا حب يغطي على زين المغطين كيما عمل صحيبو برهان بسيس...إلي رصاتلو شاد الدار مايخرجش و دورها مسلسلات.
طوال تحليل العفسة لولا، خلاصة القول : ماو زين المعذبين عذبك و برك عليك، وضح مالة تاريخك مبعد ايجا غني كيما العصافر الكل.
العفسة الثانية : هاذي مش مربوطة بالبرنامج إلي تفرجت عليه في قناة باعث القناة. بورصة الأحزاب تقول إلي سعر الإقفال بالنسبة لعدد الأحزاب 80...قادر على التحسن. الحاصل ها السبعين إلي يعايطوا في المنابر على الحكومة و يحبوها تستقيل و درا شنوة ولي يناديوا بالتشغيل و تحسين الإقتصاد. بربي سؤال للعصافر الثمانين : فماش واحد منكم حضر مخطط إقتصادي و تشغيلي صحيح و على قاعدة ؟ اش قدمت إلى الناس؟ اه و لا حقا انتوما لاهين تتناحروا شكون يركب خير على الثورة...سامحني على البهيم.
المشكلة كبيرة و حتى لتوا ماريت حتى حد جدي فيها الحكاية. إذا بايا نفيق بالبروجرام متع طارق المكي ولي نراه أنا ،حسب راي الراجل الكبير إلي عمرو 85 سنة و لي مايفهمش كيما قال عبد الوهاب الهاني برشة : بروجرام ذكي، طموح، دقيق، موجه و لي أهم يخدم على المدى البعيد...
الفكرة الإقتصادية متع طارق المكي هي تقسيم تونس للفيديراليات. هاي بشوية شبيك دز !!! اصبر نفهمك يا وليدي. التقسيم هذا متع الأقاليم موش تقسيم سياسي (كيما يحبوا في العراق)، لا تقسيم البلاد يكون على أساس اقتصادي يتمركز فيه ثلاثة اقليم : الشمال،الوسط و الجنوب. كل فيديرالية تاخوا إختصاص معين وهكذا داواليك. نعرف إلي الحكاية موش ساهلة أما ما تنساوش إلي البروجيه راهو على المدى الطويل و من أهدافوا القضاء على الجهويات و تولي كل ولاية تحكم في مصيرها الإقتصادي...زعمة ماهوش حل ؟
طارق المكي يزيد يفسرلكم بالفيديو :
يا أخي ما ناش خير من ألمانيا باش نقولوا لا لمشروع كيما هذا...
نقطة أخرى، حكاية التشغيل مهمة برشة، حسب كلام طارق المكي، سيرتو مايلزمش التفرقة بين أصحاب الشهائد العليا أو محو الأمية (حقيقة فقت بيها مخر) و بين العاطلين على العمل إلي ماعندهمش شهايد خاطر حتى هوما عندهم الحق.
خلاصة الحديث، طارق المكي لعندي معاه لا حرثة لا ورثة و حد ما ظغت عليا باش كتبت الكلام هذا. بابا عزيزي ما يتأثر بحد.
كلمتين نحب نقولهم إلى طارق المكي : وريت بالحق إلي إنت سياسي محنك و طلعت فرد حكة إلي أنا جيت منها حتى كان أكبر منك. نحب نقلك إلي ماذبيا نراك نبار سياسي من الدرجة لولا موش رئيس خاطر نحبك شوكة للبلعاطا و الفشلامة... أما مادام فما برنامج سياسي واضح و بروجيه إقتصادي طموح يضهرلي فكرة تأسيس حزب حركة الجمهورية الثانية وارد ياسر. و بنسبة لموضوع الدوسيات متاع المعارضين إلي في داخلية، إن زادة كيفك نحبهم يتحلوا خاطر كان يتحلوا باش تراصيلنا نقسموا عدد 70 على روحو و النتيجة صفر حزب سياسي يقعد...
يا طارق يا مكي...أحسن حاجة فيك موهبة التنبير السياسي أما رئيس...
ملاحظة : لست انتمي لأي حزب، مجرد راي سياسي بعيد عن كل الحسابات و المؤامرات...بابا عزيزي و في للمبدأ متاعو "السياسة ماهاش عاطفة".
نجم نكون صحيح ماكانش راهم غلطوني و لا وليت هاني برشة...
