 |
| الشيخ راشد الغنوشي...وقيت باش توضح برنامج حركة النهضة الصحيح |
مانيش لهنا بش ناتاكيك و لا بش نبر عليك و انتي تعرف الشي هذا. تعرف زادة إلي أنا وياك الزوز من أرشيف واحد الفرق بيناتنا ماناش فرد حكة...كيما قال سي الباجي قايد السبسي .
بالأمس الغير البعيد، قلت إلي أسامة بن لادن مجاهد ضد الطغيان ولي هو مثال لازم لعباد الكل تاخو ثنييتو. خاطروا يضهرلك انتي لوجيك في معالجتو للعلاقة مع أمريكا. عييت و إنت تشكر فيه السيد هذا و تهللو على خاطر كل مرة يعمل البوز BUZZ بتفجير و لا ثنين.
أباي !! تشكر فيه على حاجة معملهاش من أصلو !! إنتي تعرف إلي هي تمثيلية من عند عمك صام و تعشى على بن لادن ولي السيد هذا في أغلب الحالات فزاعة ماعندهاش وجود...اش خلاهم دفنوه مع الحوت...
براف مش هذا موضوعنا، أنا إلي نحب نحكي فيه اليوم حاجة أخطر برشة. كالعادة باش نستعرضهم عيش و ليداتي وتبعوا عزيزكم 2.0 مليح مليح :
- العفسة لولا : لاحظت عليك يا شيخ راشد حاجة ياسر خطيرة اسمها إزدواجية الخطاب. وليداتي منشيش تسخايلوني نحكي على إزدواجية كابتن ماجد و بسام... لا غالطين .الازدواجية هذي يعرفها أربعة من ناس : بابا عزيزكم 2.0 ، زين المزدوجين ، سي الباجي قايد السبسي وشيخنا راشد.
بربي سؤال سي راشد : شبيني كي حطيت الجزيرة المرة إلي فاتت نرقاك رجعت في كلامك على بن لادن ومن غير ما تشعر وصفتو بالإرهابي وردتيتو هو المسؤول الأول على مشاكل العالم...هذا بريمو. سوغوندو، إشنية تقصد كي قلت ميليشيات الحزب الحاكم هي إلي قاعدة وحدها تثير في الفوضى. معايا زوز فيديوات، فيهم بش نثبت نظرية الازدواجية الغنوشية في الخطاب السياسي، أون بليس متحبش تتعترف إلي فما في تونس معارضين ليك وكل حاجة تلصقها في التجمعيين المنحطين حاشى إلي ما يستاهلش :
تذكير : الفيديو هذا ماخذو من باج لا تمثلني
رد بالك طيح في الغلطة... موش شعب تونس الكلو من التجمع...فما زادة شكون ما يحبوكش
- العفسة الثانية : في نفس السياق زلعتها ياسر بالكلام قبل و بعد الثورة. نعرف إلي فما حملة كبيرة عليك و على حركة النهضة عموماً و أنا ضد هذا. لكن كان ترجع شوية للتصريحات متاعك تو ترقى روحك ديجا ستفزيت لعباد و خليتهم يحقدوا عليك. أعمل فلاش باك صغير واتو ترى :
اه هاذي ما نسامحكش عليها جملة خاطرك سابيتلي ولدي و ولد ولدي إلي كان موش هوما راك ماكش في تونس تتكلم ....
في النهاية ،مجرد نصيحة ليك يا شيخ راشد من عند راجل كبير من فرد أرشيف أما من حكة أخرى : وضح الخطاب السياسي لناس، أحكي معاهم، اقنعهم مافيها باس كان تعمل حوار مع إلي تسميهم العلمانيين... تتناقش معاهم وتوضح وجهة النظر متع الحركة متاعك.
منشيش تنسى كلمة الديمقراطية إلي غنيتهالنا بعد الثورة...وتولي هكا ؟
يزي من الاتهامات وأخزر لبعيد شعب تونس مايحب يقصي حد، خاصةً لعباد إلي اضطهدهم زين المضطهدين. حاول إستغل الفرصة التاريخية مكانش راك باش تهرم و الهجمات إلي قاعدة تتنظم ضدكم ماهاش باش تاقف. أنا راني معارض كلياً الحملة إلي ضد حركة النهضة وحسب رايي، ماينجم يوقفها كان إنتي. أنا هاني نصحتك و انتي دليلك ملك...
نجم نكون صحيح ماكانش راهم غلطوني ...
baba 3zizi 2.0
يرحم والديك يا باباعزيزي في كل كلمة حليتلي عينيا على برشا حاجات أما غضنوشي لازمو يتنطر معاك فرد حكة سنون بش يظيع
ردحذفmaw9fek mel ghanouchi wenahdha weli 9a3ed ysir mahuch wadha7 barcha fil article hedha. marra n7esuk dhed w mara n7esuk m3a w en fin de compte ma5rajtech bmaw9ef wadha7.leklem yeser mezyen w tar7 salim w metmesek. wadha7 li enti metmaken mel mas2la li ta7ki feha w 3aref bedhabt win tenzel bech tched el9a2 mé just 7abinek to5rjelna b conclusion sari7a; enti m3a chkouuuun? :)
ردحذفSehel yesser w haw bech n9olek maw9fi : ena lani m3a enhadha walani thedha. C'est vrai t7essni mouch wada7 barcha fi klemi ama ken ta9ra sous les lignes tnajem ta3ref 2entime2i. ena mon5aret fi 7ezeb essmou "tounes aw la a7ad" man7ebech el 2e9ssa2 w man7ebech zeda e tbahbir wel ketheb. hetheka 3lech na7ki beklem metwazen man7eb noghlot fi 7ad. ena juste na3ti fi rayi d'après les analyses mta3 rajel 3omrou 85 sné wmghroum bel web 2.0 :p
ردحذف