موتور تنسنيس

الخميس، 5 ماي 2011

بابا عزيزي و سي فرحات الراجحي ...


...مانيش عارف ياخي تقصد في الميليشيات ولا

باش نبدا المداخلة متاعي أول حاجة بتعريف ضريف لكلمة بوز بوليتيك أو الضجة السياسية : في أغلب الحالات تستعمل هذه التقنية لتلميع صورة أو للترفيع من شعبية رجل سياسة و أحسن مثال لهذا هو محاولة سي محمد الغنوشي تلميع صورتو عن طريق الصحافة...والنتيجة هو ديقاج و الشخص إلي تلهالو بكل هذا تضر في مصداقيتو و مل أحسن منذكرش اسمو...

بعد التعريف البسيط للبوز بوليتيك، باش نحكي على سي فرحات الراجحي و الفيديو إلي كيما سماوها البعض قنبلة. باش نحاول المكسيموم بش منطولش، من ناحية أخرى برشة عباد بش تتصدم ملي باش نقولو...أما مع كل احتراماتي للجميع بابا عزيزي 2.0 مايشوفش لومور كيما لعباد الكل. كي العادة تبعوني مليح عيش وليداتي :

  • العفسة لولا : برشة توانسة تبلانجات في الحجر بعد الفيديو. من غير ما ثبتوا لا في الفيديو هي بيدها. لا الكلام إلي تقال فيها و لا لعباد إلي شاركو فيها "مباشرين وغير مباشرين ". ما زاد هلكنا في هل البلاد كان تصديقنا لكل شي !!
فما حاجات فرعسوني و برشة اسئلة خالاتني نشكك في الفيديو. أول حاجة وقتها، علاش توا بذات ؟ قرار اقالة سي فرحات عندو برشة علاش توا بركة حير لحكاية ؟ ثاني حاجة شنوا معناها سي فرحات يقول للصحافي ما تكتبش و من شيرة أخرى مخليه يصورو...

أباي !! شنية لحكاية ياخي ؟ ياخي شبيك بدلت الديسكور متاعك ؟ يا سي فرحات راك جبتها صحري بحري وحتى كلامك و لا متع قهاوي. إتهام لعباد منغير حتى دليل و سيرتو في وقت كيما هكا يخليني نشكك في الفيديو. ربي يفضلي سمعي و عويناتي إلي عاونوني بش منتأثرش فيسع بالحكايات هاذم ...






 حيرني الفيديو ياسر غامض...سي فرحات فيه ضهرلي ماهوش موضوعي في كلامو  

  • العفسة الثانية : بش نختزلها في أربعة جمل : قلت في الفيديو الثانية إلي الحكومة غير شرعية !! بما انك قاضي، نحب نفهم علاش مالة قبلت بش تخدم في زوز حكومات متع سي محمد الغنوشي وسي الباجي قايد السبسي. زعمة هاذي موش إزدواجية في الخطاب...فكرتني بالشيخ راشد الغنوشي إلي يلعب على حبلين...








الإزدواجية الفرحاتية...  
  • العفسة الثالثة : يضهرلي حمدي بن صالح إلي عمل الانترفيو نسا إلي هو قرا صحافة. نسا زادة إلي لزامو حتى و كان يخدم فريلانس "حر"، باش يلتزم بالحياد و ما يعطيش رايو فلي قالوا سي فرحات هذا بريمو. سوغندو، كلام سي فرحات ماهوش قران منزل بسيف على العباد الكل تصدقوا. تذكير بسيط إلي إنت خالفت زوز حاجات في مهمة الصحافة ولي هوما : التثبت من المصدر تثبت دقيق و ضيعت الهدف متاعك كي عطيت رايك و نسيت إلي موش الناس الكل يخمو كيفك...أنا شخصياً نفهم في السياسة هاذاكا علاش نشكك فلي تقال الكل...معلومة أخيرة ليك لازمك تعرفها ماكش إنت إلي تقول "ce qu'on doit faire" خاطر كاينو ما تعرش العلاقة بن شنية يلزمنا نعملو و الشك...فركس عليها في كتاب فلسفة هذي.

 لم تقنع أيها الصحافي لأنك لم تلتزم بالحياد

باش نختم، أنا متأكد إلي كلامي باش يشوكي لعباد برشة. باش يقولوا بابا عزيزي 2.0 خرف، أما أنا نقلكم حاجة وحدة حضروا رواحكم للزعماء الجدد. فما برشة حاجات بش تتغير وأكيد الموضوع هذا بش نرجعلو مرة أخرى...بابا عزيزي مازالت البركة. لحكاية لازمها أكثر حلقات.

يتبع...

نجم نكون صحيح ماكانش راهم غلطوني ..
.
                                                 
 baba 3zizi 2.0      

هناك 3 تعليقات:

  1. أنا يا بابا عزيزي 2.0 تشوكيت براسمي ما نكذبش عليك إنشاله الوقت يخرجك صحيح هذا منقلك عندك حاجتين نهنيك عليهم
    1- إلي لاصحافي محترمش مهنتو وعندك حق
    2- راجحي معندوش مبرر كيف ميقول صحبنا باش يحكي في حكاية هكا ودجا ناس الكل داخلا في حيط ومش عارفة شتعمل
    إنفان ربي يهدي ما خلق أما أنا وحدة مناس دخلت بعضي بضبت عندي كنفيونس في كلامك خاطرك راجل كبير ورزين ويعطيك إصحى فيقتني على شيرة أخرى من لحكاية يرحم بوك

    ردحذف
  2. مواطن تونيسي6 ماي 2011 في 10:19 ص

    انا واحد مناس مصدق كل كلمة قالها سي فرحات نحس انو راجل صادق وما ينافقش .
    حاجة وحده اللومو فيها هو حديثو على الجيش التونسي ورغم اللي كلامو فيه الصدق.

    يا بابا عزيزي حتي نا من نفس الارشيف تقريبا

    ردحذف
  3. حاجة باهية برشة يا مواطن تونسي كي نطلعو الزوز من فرد أرشيف. أما ضاهرلي بالحق ماناش فرد حكة. خاطر السياسة عمرها متتفهم بالعاطفة. السياسة كومباس و تحليل لازمك تعرف زادة إلي مافماش حاجة تجي هكاكة لله في سبيل الله...فما ديما علاش ...

    ردحذف