موتور تنسنيس

الأحد، 1 ماي، 2011

بابا عزيزي و الشهيد فرحات حشاد...

المناضل الوحيد إلي مخدمش مخو على تونس : فرحات حشاد

توة قرابة 59 سنه تعداو على إستشهاد المناضل فرحات حشاد، أول مرة نحس إلي السيد هذا خذا كارو. أحسن كادو ينجم العبد يحتفل بيه بعيد الشغل إلي كنا قبل نخموا فيه كان عل فيشتا : هو شريط وثائقي على فرحات حشاد. البارح 30 آفريل 2011 في صالة لافريكا تونس، عملوا بروجكسيون شريط متع الشهيد. شخصياً بما اني حضرت متتصوروش قداش فرحان وخاصةً كي ريت عايلة الشهيد الكلها جات السيدة أم الخير، ولدو نور ألدين وبنتو.. 

ديقاج يا بيوع... الشهيد موش محتاج لتنوفيقك   

بعد البروجكسيون، قعت حال فمي باهت !! إسئلوني علاش نجاوبكم ؟ 

وليداتي إلي ريتو شي من العجب...نكتة كحلة قعدت في قلبي... التدخلات متع الحاضرين حاجة تضحك وشطرها خارج الموضوع، النقاشات بيزنطية ولاة... و تحل كوري في الصالة على غير مفما شي. صحيح هو الشريط مهوش حاجة خارقة للعادة من ناحية التصوير و تسلسل الأفكار أما الفيلم الوحيد إلي تجرأ بش يحكي على دوسيات مسكرة من عام 1952...الفيلم هذا هبط عام 2009 معناها في عهد زين الخيانة...و نتوما إفهموا وحدكم ... 
 
عزيزك 2.0 فايق  وشمها قارصة بعد  المداخلة متع نور الدين حشاد (ولد المناضل) ولي فيها كشف المستور على تفاصيل الاغتيال والمتواطئين فيها، اليد الحمرة و سقوتياتها... و سيرتو نقطة الاستفهام على علاقة فرحات حشاد بالحبيب بورقيبة إلي بش نحكي نهار لازم عليه في أرتيكل وحدو...

كمشة عباد قاعدين من تالي مفهمتش اش بيهم قاموا يعيطوا "توة تأكدنا إلي الشهيد مات " و دخلوا بعظهم كي دار الفرح...أباي !!! فاش قام   ؟

الناس هاذوما معجبهمش كلام ولد فرحات حشاد تقول هوما يحبوه أكثر منو ولا من عايلتو، انا نسميها قلة تربية هاذي على خاطر في سبرنا والدينا ماعلموناش نقصوا علي يتكلم ولي أغرب لا واحد فيهم إحترم عل قليلة عايلة الشهيد...

ملة خور وملا تسيب ولا في بلادنا !!!! أقوى لقطة شفتها في الخوذة هاذي، قناة حنبعل تيفي...دوم ما لحمت بالحس ترموا يصوروا...اه منك يا باعث القناة !!!     

عندي كيلمة في الاخر نحب نقولها لناس هاذم جماعة التفليم والأصوات العالية، إلي عندو وثيقة  تثبت أي حاجة في موضوع فرحات حشاد معليه كان يتقدم بها، كان معندكمش بربي اسكتوا ونقصولنا مل الحس. ولي كان مخبي وتوة وين طلع راسو معليه كان يعاود يخبيه على خاطر الصلوحية متاعو وفات ...ولي متعلمش في المدرسة اداب الحوار معليه كان يرجع لل مكتب ويهز لمجة معاه... 

سامحوني عل كاليتي...راني نسيت المصورة : هذي السيدة أم الخير لحظة تكريمها

الحاجة الباهية ولي فرحتني بعد ماخرجوا جماعة الحس... قعدوا برشة ناس منهم العبد و لللله، الراجل الكبير إلي غنى كيما لعباد الكل النشيد الوطني و صفق كي كرموا السيدة الفاضلة أم الخير مرت الشهيد...الله يرحمو وينعمو .

نجم نكون صحيح ماكانش راهم غلطوني ... 

baba 3zizi 2.0                

بابا عزيزي و باعث القناة ...


باعث القناة إلى جانب قاناتو

قداش من مرة نقلكم عيش وليداتي بدلو عليا راهو  قلبي معبي... قداش من مرة نقلكم ماعاتش عيني لا بش نتفرج و لا بش نسمع هل قناة. قداش من مرة نقلكم فاض الكأس من كلمة، نسمع فيها ليل على نهار 24/24...وشنية الكلمة ؟ بيان سير : باعث القناة

قداش من مرة نقلكم زابيوا عليا هل قناة و لا ناحيوهالي جملة من ليستا متاع البارابول... خاطرني حتى كاني 2.0 ونعرف كل شي والله كي نتفرج في "حنبعل تيفي" يركبني لعصب و ننسى كل شي.

اخر ما صدر، بيبلسيتا جديدة ، لاهي متاع ياغورت ولا هي كويكة... بيب جديدة اسمها "لم ننتظر 14 جانفي 2011". توا تبركالله 85 سنة ولا عمري ريت شي عايناني كيما هذا...

كل مرة فيديو جديد و يقولونا فيه إلي هو تمنع مل بث... أباي !!! شنية العلاقة مع 14 جانفي ؟

ياخي نسيتوا البكية متاع "المنصف بن سعيد" ؟ ياخي نسيتوا التبندير ألا محدود متاع المنشطين متاعكم على خاطر سيادتو "زين البندارا" عطاكم جرد 30 سيغوندا متاع المتشووات...هذا الكلو نسيتوه ومبعد تقولوا مضغوط عليكم ؟





دموع تماسح... تسخف باعث القناة

بسيف تحبوا تعطيونا الفترينا النظيفة متاعكم و تغاطيو علينا السلعة إلي في ستوك...  

أنا واحد من ناس نقلكم هرمنا ...هرمنا من كثرة الباراتان متاعكم. هبلتونا باللغة متاع النجارة متاعكم "اللغة الخشبية"...توا فهمت اش معناها القناة الوحيدة إلي متغطي كان الحقيقة، بعبارة أصح تغطي في الشمس بالغربال.
 
 بربي في الاخر، نصيحة من عند راجل كبير راسو شاب. بدلو إسم باعث القناة بإسم اخر خاطر كان فما واحد باعث قناة حنبعل تشيت راهو انا. تنجم تحط اسمك بهبار القناة ...
    
نجم نكون صحيح ماكانش راهم غلطوني ...  

baba 3zizi 2.0