موتور تنسنيس

الخميس، 22 ديسمبر، 2011

يحدث في تونس : ترويكا تقسيم الشعوب !






  (+) كان عجبتك التصويرة، تعمل مزية تعطيها علامة جمع 
 (-) كان ماعجبتكش...سورري، على خاطر جوجل ماخممش في حكاية الإلا 
 (bingo) كان التصويرة أفحمتك...علق و بارتاجيها على حيوط شبكات التلاقح الإجتماعي 

نجم نكون صحيح ماكانش راهم غلطوني  ولى راهم ڨسمونا على على ثلاثة ...


baba 3zizi 2.0           

الجمعة، 16 ديسمبر، 2011

لبسونا مريات المرزوقي بسيف علينا !!

المرزوقي : سيفعل بعينيك الفاحشة...ثم أجهش بالبكاء 



فادد و نحب نحكي بجمل قصيرة... 

يقولولك راك في عهد بن علي ماكنتش تلبس مريات، كنت أعمى ماتشوفش...تقلهم راني كنت نشوف غير عامل روحي أعمى ما نحبش نشوف....

يقولولك راك في الثورة ما كنتش تلبس مرايات، ياخي ما ريتش سقوط العديد من الشهداء...تقلهم حمدلله ماريتش خاطر موش كل من مات شهيد...فايق راني يا فحل...

يقولولك يا شيخ تي شبيك مالبستش مرايات، ياخي ما تحبش الطب متع الأسنان...تقلهم و الله على جثتي...راجل و عمري ما نبيع روحي... 

يقولولك راك كي حكينا على المجلس التأسيسي ما كنتش تلبس مريات،هاذاكة علاش ما فقتش بلي شدوا الكراسي...تقلهم طز في المجلس التأسيسي إلي تعمل باش نكذبوا فايس تو فايس على بعضنا...

يقولولك ياخي لتوه إنت كافر و زديهم أعمى يا ولدي ألبس المرايات بالحسنى...تقلهم وراس لحنينة في قلبي نلبسهم لوح و لا نطيح لوجوه اللوح...

يقولولك أيا إنت فددتنا، و هاو باش نلبسوهالك بالقوة مرايات المرزوقي تي شبيك راهو حوقوقي حقوقي و ما يعذبش...تقلهم أنها ثورة حتى النصر...النظر متاعي صحيح و ما نيش باش نسلم...كيما سلموا برشة ناس وباعوا رواحهم... 

نجم نكون صحيح ما كانش راهم غلطوني...ولى لبسوني بالسيف مريات المرزوقي...

baba 3zizi 2.0

الثلاثاء، 22 نوفمبر، 2011

كيف تثقف العود السياسي في أربع مراحل ؟

العود السياسي...عود يتغلغل في مفشخ القمع


صدفة !! و أنا جالس على مقاعد الدراسة...استوقفني سؤال الاستاذ أو الدكتور صاحب الشهائد الخارقة للعادة عندما قال :

من منكم يعرف معنى كلمة ثقافة؟

سؤال عميق ذو أبعد نابعة من نبوغ هذا الاستاذ...الذي اتحفنا بعد ذلك باجابة حتى أعمق من عمق السؤال في حد ذاته.

يقف منتصب القامة يمشي و يغدرنا بصفة قولة مأثورة قادرة على تدخيلك في جدار العمى جملة وحدة و قال :

الثقافة تعني تثقيف العود بمعنى تقليمه أو تنجيره من الأطراف الفاسدة ؟؟!! 

ويحك ما هذا بحق السماء ؟؟

مثل هاته الإجابات أوحت لي بمثل هذه التدوينة باللغة العربية الفصحى لأربط بين ما قال الاستاذ الموقر و بين ما أود أن اتحدث عنه و هو :

كيف تثقف العود السياسي في أربع مراحل...و هي كما يلي حتى نرفع اللبس عن الموضوع الذي حير الملايين :


*المرحلة الأولى : تأخد العود السياسي ( الشعب ) تعاينه بمعنى تنظر له نظرة ثاقبة لتحديد ايجابياته ( بالطباعة إن وجدت )...وسلبياته ( قد شعر الراس ) و في النهاية تحيله على المرحلة الثانية.


*المرحلة الثانية : تعيد تدقيق النظر في العود السياسي ( الشعب ) تفادياً لحصول أخطاء أو وجود أعوار في العود أو ربما بعض التشوهات : الخلائقية (أصحاب السوابق ) ، العراضية ( المعارضين والمناضلين )...في صورة وجود بعض التشوهات الخلقية مثل ( القفافة، تجمعيين، عملاء ، بوليس سياسي ) فهاذي حاجة ربي و لا اعتراض عليها لذا نتركها ترتع في البلاد و تتبزع و تتبرز على العود ( الشعب )...

الإسم واللقب : بوليس في يدو عود
المهنة : مسؤول أول على تدخيل العود في ثقب القمع



إذا تمت العملية في شكل هادئ أو حتى غير هادئ يمكن تقديم العود للمرحلة القادمة...

*المرحلة الثالثة : بعد التثبت من التشوهات، الإيجابيات القليلة و السلبيات الكثيرة للعود السياسي ( الشعب )...لا بد من التقليم أو التثقيف...

عجبا ما هو التثقيف ؟

هي النجارة بمعنى تنجير العود السياسي ( الشعب ) من التشوهات الخلقية التي سبق ذكرها في المرحلة السابقة...يستحسن أو لا بد من تقليم العود تقليم بوه كلب ليصبح العود عرف ماضي و مقموع قمعاً حقيقياً...


*المرحلة الرابعة : نظاف الشعب سامحوني العود السياسي و أصبح أملس، أرطب، لابد، لا حراك، و لا حياة لمن تنادي...تقوم بإدخاله طوعاً إلى الثقب الأسود...و هو ثقب الظلامية، ثقب القمع، ثقب الانحطاط، ثقب الانفتاح المنغلق، ثقب الطحين المتواصل ألخ ....

لا بد أن يكون العود ناعم الملمس كما نرى في الصورة 


ملاحظة : لا بد من القيام بفرك العود في الثقب لمدة 23 سنة و ربما حتى بعد 14 جانفي...و هكذا تضمن أن يطول و يبقى صالحاً لجميع الأزمنة للقيام بمهامه كعود سياسي مثقف قادر على التغلغل في الثقوب القمعية...

نجم نكون صحيح ما كانش راهم غلطوني و لى ثقفولي العود لطف علي...

baba 3zizi 2.0

الخميس، 3 نوفمبر، 2011

شنية الفرق بين الخوانجي و الخوامجي ؟

خانوجو الحاج موش فاهم شي : يا رجال يا قلوب الجمال... اقضوا على الزناديق



الفرق بين الخوانجي و الخوامجي هو كتحديد الفرق بين التمساح...حسب الحضارة التفسخية...من غير ما يسالني حد علي نقول فيه....أنا بيدي مانيش فاهمو !!!


بحيث أنو إذا جمعنا بعض المعطيات لتحديد نقاط الاختلاف بين هاذين العنصرين (الخوانجي والخوامجي) و من خلال تجربة متواضعة متع راجل كبير ماهوش زبراط....ماهوش عفاط (سامحوني في الكلمة) وخاصةً ماهوش زلاط.... ها الشايب ينجم يعطيكم أوجه الفرق :


الخوانجي يكذب و يصدق كذبتو... و الخوامجي كي تجي تشوف فرد حكاية !!!

الخوانجي رغم ألي غالط، يزيد يغلط الناس معاه و ينسى إلي راهو غلطوه في روحو... و الخوامجي كي تجي تشوف فرد حكاية !!!

الخوانجي يقول إلي هو متفتح و يحشي فيه، و يقول راهو مسكر و هنا ما يحشيش فيه... و الخوامجي كي تجي تشوف فرد حكاية !!! 

الخوانجي يستغل أقل زلقة و إلا حاجة كانت قبل عادية وتوا ولات حرام، باش يخربقها... و الخوامجي كي تجي تشوف فرد حكاية !!!



الخوانجي يقول إلي هو مايخممش كي الاخوان المسلمين و لى القاعدة و زيد ما يعرفهمش، و في الحقيقة يشبهلهم برشة... و الخوامجي كي تجي تشوف فرد حكاية !!! 

الخوانجي يسخايل الاسلام متاعو صحيح و يحكم و يفرق في الفتاوي، و في الحقيقة هو أبهم خلق الله وخاطيه الدين... و الخوامجي كي تجي تشوف فرد حكاية !!! 

الخوانجي يسخايل الدين يتقاس بطول اللحية إلي لازمها تمس القع... و الخوامجي كي تجي تشوف فرد حكاية !!!

الخوانجي يخلط بين الدين و السياسة و هو ما يفهم شي منهم الزوز... و الخوامجي كي تجي تشوف فرد حكاية !!! 

الخوانجي ينسى إلي الدين لربي سبحانو و السياسة للخباث من الثعالب و ليست للضبع وخوه... و الخوامجي كي تجي تشوف فرد حكاية !!! 

الخوانجي ينسى ديما إلي الاسلام أكبر منو من صحابو ينسى زادة إلي تونس بلاد إعتدال ولي مايستهلهاش و حدو وحدو يتطرد منها... و الخوامجي كي تجي تشوف فرد حكاية !!! 

كي تجي تشوف ترقى الخوانجي هو بيدو الخوامجي...بطبيعة حاشى إلي مايستاهلش...معضلة كبيرة ترقى عبد بزوز فوڨيرات...

ملاحظة : كلمة خوانجي نكرها في الدم...خاطرها تتقال برشة مرات مش في وقتها....


نجم نكون صحيح ما كانش راهم غلطوني ولى راهم هدروا دمي و أصبحت في عداد الكفار الزناديق...


baba 3zizi 2.0



التفتح


التغلق

الجمعة، 28 أكتوبر، 2011

القائمة الحصرية للي مقعدهم موش باهي في المجلس التأسيسي !!

تي أقعد على... الكرسي مدام مقعدك باهي 



مادام مقعدنا باهي و القعدة عليه حلال و مريحة.... مادمنا نحنا شعب متع قعدات و قعداتنا الكل نحكيوا فيها كان علي قعد إلي ما قعدش ولي قعدتو ما هاش لا الكل و يلمزو يصلح روحو باش مقعدو يبدا صحيح...

مادامنا مازلنا نقعدوا بالسوايع قدام فايسبوك و تويتر...انبروا علي عندو مقعدين ولي عندو ثلاثة و نحنا ماناش فاهمين هل القاعدين علاش يحبوا يقعدوا قعدة باهية في مجلس كلو قاعدين على كرسي متع قاعدين مقعدهم حلو و مريح... في بلد أثبت للعالم أجمع...أنو مراهن على القاعدين على مقاعد على مستوى القاعدة ...

مدام هذا الكل في تونس...خليوني نتكلم !! 

هاذي مقدمة صغيرة من أجل تقديم القائمة الحصرية للناس إلي تستحق تقعد مليح في المجلس التأسيسي و الناس إلي ماتستاهلش تقعد لعدة أسباب هاو باش نذكرها ما نغير ما تسينياليوني...هاني باش نڨولها :

جوهر بن مبارك أول واحد ما يلزمو حتى مقعد في المجلس التأسيسي...خاطرو خبير في القانون الدستوري 


الصادق بالعيد ما يستاهلش حتى ربع بلاصة... خاطرو خبير في العلوم السياسية


مختار اليحياوي مايستاهلش حتى ساق مقعد...على خاطرو قاضي و ناشط و مناضل 
ناصر العويني من الباب يتطرد في المجلس التأسيسي...خاطرو محامي و يفهم في القانون و نطق نهارت 14 جانفي كي هرب الشنتي بن علي 


يوسف الصديق حدو حد السور متع المجلس التأسيسي...خاطرو فيلسوف و مختص في الأنثروبولوجيا 


و توه القائمة متع الناس إلي مقعدها ياسر حلو ...


الهاشمي الحامدي مقعدو حلو و انشاالله ديما قاعد على...على خاطروا ياسر بياع أوهام

ابراهيم القصاص يستحق أكثر واحد... خاطرو ساهل ياسر و قصاص حلاوة 


صابر بن فرج يستاهل كل الخير...على خاطرو متربي فاهم الدنيا وخاصةً برنامجو واضح 



إلى هنا و كفى...الباقي ثلة من المثقفين ولي فاهمين الدنيا... 

نجم نكون صحيح ما كانش راهم غلطوني ولى حبوا بسيف يقعدوني على حاجة موش متاعي...

الأربعاء، 19 أكتوبر، 2011

يا تونسي صوت... لا تتصوت !!

قولة مأثورة من عصفور سطح : يا تونسي اصنع مستقبلك بصوابع يديك موش بصوابع ساقيك 


أجلناها الانتخابات من 23 جويلية إلى 23 أكتوبر...عياوا تنبير الفايسبوكيين و التويتريين...قالولنا المنظمين رانا ماناش خالطين...بزقنا في الشوربة وقلنا على الراس و العين...مشى زمان وجاء زمان هدوا علينا الظالميين... هبطوا بعدهم العلمانين والملتحيين لموا علينا المندسيين ...مرضونا المشرفين على صفحات المتكرزين... وزادوا كرهونا في حياتنا المتحزبين الموكرزين...هنا توه واحلين في تاسيسيين...الليستات مكدسين...و الريوس مكعبرين...شوية روجوليين... و شوية نساوين...من واحد إلى ثمانين...حاول لوج على المناسبين...

وتوه قبل بأيمات من الانتخابات وقيت باش نعملوا راي...حتى كان مخاخنا سارحين...لازمنا نركزوا مليح مليح... نوليوا متنورين ومعاتش أميين...نطردوا الظلاميين...نمركيوا بونتو على المندسين...وفي الاخر كي الواعيين نصوتوا للمفضلين و نحقروا الفوضاويين...

احزابنا ما يبعدوش برشة على الكاريكاتير أما التصويت يوم 23 أكتوبر 2011 واجب وطني و مفيد 


Allez Voter...tout simplement !!

Sinon... 








من الاخر وقيت...يا تونسي باش تصوت يهديك... لا تتصوت !!!

نجم نكون صحيح ما كانش راهم غلطوني و لى راني حطيت الورقة الحمرة بكل شفافية و حرفية...

baba 3zizi 2.0 

الجمعة، 14 أكتوبر، 2011

تونس موش متاعنا...متع الاخرين !!!

تونس متع هاذم !! 

تونس بلاد ماكيفهاش !! 

بلاد عمرها المرتحلين...سكنها المتحضرين...بناها القرطاجينيين...صلحها الفاتيحيين...هناونا عليها المسلمين...فكوها المستعمرين... على خاطر مدوها المغشوشين...وقفها المقاوميين...و حررها الفلاڨيبيين...شدها البورڨيبيين...و تعذب فيها المعارضين...تكالبوا علاها المتوزرين...تمعشوا منها اللاحاسيين...و في الاخر تعطات للبنعليين...إلي مدوها ببلاش للطرابلسيين...والنتيجة تغبنوا فيها الزواليين...صبروا فيها المظلومين...و عاودوا تعذبوا فيها المعارضين...ما نساوهاش المغبونين...على هذاكا علاش رجعلها كرامتها المتعطلين...صحيح ماتوا فيها برشة إستشهاديين...أما هذا سوم العيشة في بلاد المتحررين...شككونا فيها المشككين...باش رعبونا فيها المرتزقين...أما حمد الله حماها رجالها الحامين... 

توا بعد ما فرحوا بالثورة المنتفضين...ركبوا عليها الضبابيين...صبوا علينا الملايين إلي و هبوهالهم الاجنبيين...مرة ناهضين و مرة متكتلين...مرة ديمقراطيين و مرة توويين...ملة فدة مع الغنيين... من الكذب باش يردونا فقريين...أخيييت على هل المندسين ! 

تونس بعد ما شاخوا فيها طرحة المتحزبين... دخلوا فيها الرجعيين...مهمشوها المنسلخين... و في اخر و لات حرب بين فكرتين...من شيرة يجبدوا فيها العلمانيين و من شيرة أخرى الاسلاميين... 

الاسلاميين جندوا الملتحيين...و العلمانيين عملوا رواحهم متلفين باش يغزلوا المتغششين... و على خاطر تونس عبثوا بيها الإعلاميين...تبزعوا فيها المتنسمين...وخاصة الباعثيين و الحنبعليين...و شكون تطرد منها المتونسيين قال شنوة يعاونوا في المترشحين...جماعة التأسيسيين... 

وتوا قبل بأيمات من إختيار المناسبين...تلهينا في المتطرفين و اعدائهم الملحدين...وخلينا الهاربين من المرتشين و المفسدين و الظالمين و الانتهازين... 

من الاخر هاذي بلاد موش متاعنا متع الاخرين...احنا توانسة بالكلمة... 

نجم نكون صحيح ما كانش فلموا علي بلحية ولى اقنعوني بلحدة...

baba 3zizi 2.0 

الاثنين، 10 أكتوبر، 2011

سامي الفهري شيطان و باعث القناة و القروي ملايكة...

التكتل من أجل التكتل على الإعلام التونسي : صوتوا لقائمة باعث القناة و نبيل العروي 



قبل ما نبدى نحب نفتتح بقولة :


" إي نعم الفهري ماسوني...و ماسوني على الاخر وفي بعض الحالات شيطان..أما باعث القناة و نبيل العروي (القروي) ملايكة و عيب نتكلموا فيهم !! " قولة مأثورة من أدمين إتحاد صفحات الشاكرين لقناة حنبعل وإتحاد صفحات الشهيلي...

ياخي الكلام هذا موش تزفزيف و لا أنا مسطك ما نفهمش ولى الويندووز متاعي خج ؟ ياخي لتوى لا حبت لعباد تفهم إلي سامي الفهري و قناة التونسية مستهدفين ملي طلعت بعابص الكبار ؟

فيبالنا بيه خدم مع بلحسن الطرابلسي و ترفك في سيكونسواوت متع البيبلسيتي...أما هذا الكل كلام و مافما حتى دليل لتوى هاذي الحاجة لولا...الحاجة الثانية جماعة التلفزة الوطنية ( تونس طبعة سابقاً وربما حالياً ) زعمة قبل مكانتش فيفتي...فيفتي مع الفهري في البيب ؟ هذا بنسبة لجماعة الوطنية...

بنسبة لباعث القناة ملي بدات الثورة لا يزي حل على الشعب الحرب باللإشعات و التلفيق و الفجعات و لا يزي خدم النبارة متاعوا على الفهري...مع كل احتراماتي لقناة حنبعل و العاملين فيها وخاصةً باعث القناة...ما نحترم حد فيكم خاطر كان باش تسكر التونسية باش ترصيللي نتفرج في "المسامح رحيم" ولى " لم ننتظر 14 جانفي" ولى " اوربن خنن" ولى "سويعة فطور" ولى "بالمسفوف"....وخاصةً النشاط الرئاسي متع الباعث الحالات...



لم ننتظر 14 جانفي.... 




في حالة نبيل العروي...نسمة تيفي ماسايبتش إشاعات هاذي حاجة خاطيتها جملة جملة...أما الكونت يوتوب متع القناة قبل 17 ديسمبر 2010 عمرو ماحسسني إلي القناة هاذي ثورية، ساهل ياسر خاطرها صاحبة الاغنية الشهيرة " يا بونا لعزيز...يقولك احنا الزين" 






لم ننتظر 17 ديسمبر....



مع كل احتراماتي لقناة نسمة و العاملين فيها وخاصةً نبيل العروي...ما نحترم حد فيكم خاطر كان باش تسكر التونسية باش ترصيلي نتفرج في "ممنوع على البنات" ، "ناس ترمة" ، "ناس فطور"يمين يسار على الحيط" و خاصةً الاطلالة الشهيرة لنبيل العروي باش يقلنا راهو شركة صبر الأراء قالت راهو نسمة جات لولا في إمتحان التفليم على لعباد...

من اخر و على الاخر و من غير ماحد ما يطلعلي بيكسالات الدم لراسي و من غير ماحد يتويتيلي ترينو في مخي...سامي الفهري انسان برو...ولي ماعجبوش يكسر راسو...و ماداموا يخدم في خدمة صحيحة وحتى كان سكرولوا القناة متاعوا "التونسية"...أنا على بركة الله نشرع في حملة المناشدة ليه باش ما يسلمش في حقو و يتبع السارق إلى باب دارو وخاصةً يكمل يخدم باش يرجع البرامج إلي تقصوا خاطرني مع الانتريت و الكونكسيون الزبلة إلي عندي و زيدهم الڨينيا ، نقلكم راني ما نتفرج كان في التونسية حتى كان تعاود في نفس البرامج... 

وهذا إختياري ولن أعدل عليه...
المرة هاذي بسيف صحيح ما كانش راني وليت غلام باعث القناة أو غلام نبيل العروي...


baba 3zizi 2.0

الخميس، 6 أكتوبر، 2011

يا تونسي يا جبن...سامحوني يا جبان...

الديمقراطية عند التونسي...مقرونة و خبز 


رسالة مفتوحة من بابا عزيزي 2.0 لكل تونسي يحس الكلام هذا موجه ليه :

قلنالك راهم المحتلين قصفوا ساقية سيدي يوسف...مشيت تشري في المقرونة و الخبز...
قلنالك القذافي باش يزدم علينا...مشيت تشري في المقرونة و الخبز...
قلنالك راهو فما فجوة رقمية...مشيت تشري في المقرونة والخبز...
قلنالك راهي الثورة جات...مشيت تشري في المقرونة و الخبز...
قلنالك راهو تونس صعيب تترشح للكوب دافريك...مشيت تشري في المقرونة والخبز...
قلنالك راهي الدنيا باش توفى غدوة...مشيت تشري في المقرونة والخبز...
قلنالك راهي الثورة ما تكمل كان ما نعملوا إنتخابات...مشيت تشري في المقرونة و الخبز...

قلنالك راك جبن...سامحوني جبان...تغششت وكفرت...قداش باش تقعد ديما تخمم في روحك. ماتت ناس و جات ناس باش سيادتك تعيش في بحبوحة من العيش...و أنتي ولا على بالك...بالك ولا توحشت أيمات زين العيش الكريم ؟

قلي وقتاش ناوي تعمل قلب وتكون ديڨوردي وتخزر مرة للمستقبل بعين متفائلة مش عين جيعانة ؟
قلي وقتاش ناوي تنسى الشماتة و تخديم المخ و التفتيف باش تونس تولي بلاد بين البلدان ؟
قلي وقتاش ناوي تولي كي تسمع إسم تونس تفتخر و ماتسبهاش و تدافع علاها كي يسبها البراني ؟
قلي وقتاش ناوي تولي كابابلي و تنقص من الاعتصامات و التفليم و تولي تخدم لأول مرة في حياتك ؟
قلي وقتاش باش تمن إلي الانتخابات هاذي ظرورة لمستقبل ولادنا و موش فرصة باش تشري المقرونة والخبز ؟

قلي كان ماكش ناوي...نقطنا بسكاتك على الأقل.. و أرجع كيما قبل.. أيمات إلي عشت فيها ساكت للي وليت لابد ...و منافق للي وليت كيفهم فلول النظام السابق...

نصيحة من راجل كبير عندو برشة ما عملش تدوينة في شكل دوانة : كانك ناوي على الخير وتحب تونس تاخو الثنية الصحيحة في الانتخابات مرحبا بيك...كانك خايف على المقرونة و الخبز لا يوفاوا...

نقلك ديڨاج...

تحيا تونس تحيا الديمقراطية...و حشى إلي ما يستاهلش و السلام.

نجم نكون صحيح ما كانش راهم غلطوني وبربي صلحولي وكان لازم سيبوني و حتى كان رجل كبير...سافا هكى !!!

baba 3zizi 2.0 

السبت، 24 سبتمبر، 2011

زابا علي يفكتر... و أحنا نخلصوا !!






  (+) كان عجبتك التصويرة، تعمل مزية تعطيها علامة جمع 
 (-) كان ماعجبتكش...سورري، على خاطر جوجل ماخممش في حكاية الإلا 
 (bingo) كان التصويرة أفحمتك...علق و بارتاجيها على حيوط شبكات التلاقح الإجتماعي 

نجم نكون صحيح ماكانش راهم غلطوني  ولى راهم  بن علوني ...


baba 3zizi 2.0           

الأربعاء، 14 سبتمبر، 2011

راشد الغنوشي يبزنس على ثورة...






  (+) كان عجبتك التصويرة، تعمل مزية تعطيها علامة جمع 
 (-) كان ماعجبتكش...سورري، على خاطر جوجل ماخممش في حكاية الإلا 
 (bingo) كان التصويرة أفحمتك...علق و بارتاجيها على حيوط شبكات التلاقح الإجتماعي 

نجم نكون صحيح ماكانش راهم غلطوني  ولى راهم غنشوني ...


baba 3zizi 2.0           

السبت، 27 أوت، 2011

ياخي برسمي الخدمة يلزمها كتف ؟






  (+) كان عجبتك التصويرة، تعمل مزية تعطيها علامة جمع 
 (-) كان ماعجبتكش...سورري، على خاطر جوجل ماخممش في حكاية الإلا 
 (bingo) كان التصويرة أفحمتك...علق و بارتاجيها على حيوط شبكات التلاقح الإجتماعي 

نجم نكون صحيح ماكانش راهم غلطوني  ولى راهم عيدوا عليا ...


baba 3zizi 2.0           

الخميس، 11 أوت، 2011

"صحة شريبتك" متع الشيخ مورو...كونوليا صبة اسمها باعث القناة






  (+) كان عجبتك التصويرة، تعمل مزية تعطيها علامة جمع 
 (-) كان ماعجبتكش...سورري، على خاطر جوجل ماخممش في حكاية الإلا 
 (bingo) كان التصويرة أفحمتك...علق و بارتاجيها على حيوط شبكات التلاقح الإجتماعي 

نجم نكون صحيح ماكانش راهم غلطوني  ولى راهم فتحوني ...


baba 3zizi 2.0           

الأربعاء، 10 أوت، 2011

بيان الرؤساء المخلوعين...

الحاج يودا متع عركة النجوم : خلع ،يخلع، خلوعا...معناها جابولوا شعب و قيموه من الشيز لونڨ متاعوا 


 نحن زين العابدين بن علي، حسني مبارك، معمر القذافي الرؤساء المخلوعون والقادمون ، أصدرنا البلاغ التالي :

إن التضحيات الجسام التي اقدمت  عليها الشعوب العربية ،وتونس أول شعب متحرر، رفقة رجال بررة في سبيل تحرير البلاد وتنميتها

لا تحصر ولا تعد. لذلك أحببنا وقدرنا وعملنا السنين الطوال تحت امرة الغرب في مختلف المستويات، وذلك لقمع أي رأي، أي تحرك، أي صوت، أي معارضة، أي حزب نزيه. عملنا على هذا بكل ثقة وإخلاص وتفان. ولكن الواجب الشيطاني  يفرض علينا اليوم أمام طول شيخوختنا واستفحال مرضنا وعودة جبننا وقلة ضميرنا وخوفنا الشديد من الحرية،  أن نعلن، اعتمادا على تقريرعجز، اننا اصبحنا عاجزين تماما عن الاضطلاع بمهام رئاسة الجمهورية.

وبناء على ذلك، وعملا بإرادة الشعوب ، نتولى بعون الله وتوفيقه تقديم لمحةٍ عن كل رئيس يخلع في المستقبل بما فيه نحن وسنعتمد في مباشرة مسؤولياتنا على Don_Dali في هذه المهمة الدقيقة، الذي لن يتوانى عن تقديمنا بصفةٍ شفافة. يجب الذكر اننا لسنا بحاجةٍ إلى الويكبيديا أو الوكليكس للقيام بمهامنا...

إن استقلال شعوبنا  وسلامة ترابنا ومناعة أوطاننا وتقدم شعوبنا هي مسؤولية كل العرب وحب الوطن والذود عنه والرفع من شأنه واجب مقدس على كل مواطن

أيها المواطنون، أيتها المواطنات  

إن شعبنا بلغ من الوعي والنضج ما يسمح لكل أبناءه وفئاته بالمشاركة البناءة في تصريف شؤونه في ظل نظام ديمقراطي يولي المؤسسات مكانتها ويوفر أسباب الديمقراطية المسؤولة، وعلى أساس سيادة الشعب كما نصت عليها ثورة 14 جانفي 2011، فلا مجال في عصرنا لرئاسة مدى الحياة ولا لخلافة آلية لا دخل فيها للشعب، فشعبنا جدير بحياة سياسية متطورة ومنظمة تعتمد بحق تعددية الأحزاب السياسية والتنظيمات الشعبية

وإننا سنعرض قريبا مقالاتٍ في ثلاث حلقات قصيرة عن الرؤساء المخلوعين... 

وسنحرص على إعطاء الفرصة لكل رئيس يوقع معنا هذا البيان ، فلا مجال للظلم والقهر، كما سنحرص على إعطاء الشعوب هيبتها,  فلا مكان للفوضى والتسيب ولا سبيل لاستغلال النفوذ أو التساهل في أموال المجموعة ومكاسبها

وسنحافظ على حسن علاقاتنا وتعاوننا مع كل الدول، لاسيما الدول الشقيقة والصديقة التي قد تؤوينا ساعة هروبنا ، كما نعلن احترامنا 
 لتعهداتنا والتزاماتنا الدولية. 

وسنعمل بخطى ثابتة على عدم العودة والذهاب قصرياً إلى مزبلة التاريخ وكتابة اسمائنا بأحرف من ذهب في سجل الرؤساء الشياطين.  

أيها المواطنون، أيتها المواطنات..

انه عهد جديد نفتحه اليوم معا على بركة الله بجد وعزم، وهو عهد الإعترف بالشعوب وبحريتها وحقها في تقرير مصيرها. وفي نهاية نؤكد على عزمنا على إختفئنا تماماً من الحياة السياسية وكل أمانينا عدم محاسبتنا على اخطائنا مع علمنا بصعوبة الأمر. 

  لتحيا تونس .. لتحيا الجمهورية   "وقل اعملوا، فسيرى الله عملكم ورسوله والمؤمنون" صدق الله العظيم والسلام عليكم ورحمة الله 

 وبركاته .


موقع من طرف :

بن علي...محامي الشيطان بڨرن واحد برك 

حسني مبارك...عودة المومياء العمشة 
القذافي...باعث الذبان


نجم نكون صحيح ما كانش راهم غلطوني ولى خلعوني...

baba 3zizi 2.0

الخميس، 4 أوت، 2011

قائمة حصرية في التوانسة إلي عازوڨينوا رمضان السنا 2011...حاجة ليكس

حمد المغيربي : العازڨو نوع واحد سيدي خويا...إلي يفطر و يصدق 10 خبزات و يطعم 60 مسكين 


نشالله رمضانكم مبروك...وأدللوا يا مديرين. التدوينة متع المرة هاذي حاجة ليكس ياسر... و اتو تعرفوا علاش.

كل رمضان فما شعب إلي صايم برسمي و يتسمى عنا (شطر صيام) خاطروا يصوم على الماكلة بركة أما الباقي.... ربي يجيب. فما زادة شعب نسميواه شعب العزوڨية. الشعب هذا عندو دور ياسر فعال في المجتمع و خاصة في الدورة الاقتصادية بحيث يمنع ركود الاقتصاد عن طريق العزڨة تحت الحيط. و هكة أعمدة الاقتصاد ما تطيحش.

مهمة التدوينة هاذي فضح كل فطارة رمضان السنا...كالكو صوا (quel que soit) طريقة الإفطار أو العزوڨية متاعوا و الله شاهد علي...

القائمة الحصرية بمساهمة بابا عزيزي 2.0 باعث حركة الخلايق المندفعين





جلال كريك أول فطار على خاطروا يقول في برشة كلام زايد ... كلام كيما زبدة، عصفورة، ميدون، قهوة... مل اخر يفعل بأذنك الفاحشة.. صحة شريبتك سي جلال 


سيدة العڨربي فط...اه سامحوني موش هذي سيدة العڨربي !!!

أهيا العڨربي لورجينال فطرت رمضان السنا خاطرها طلعت لفرانسا من غير ما تشاور راجلها...صحة شريبتك عوڨربون  



كمال مرجان فطر رمضان السنا... على خاطرو كذب في برشة حاجات في حصة علاء الشابي : كذبات كيما و الله ما في بالي بشي...صحة شريبتك سي كمال    

الحاج سعيد حانوتو لاصقة حانوتي متع البسيسة... فطر رمضان السنا خاطروا كل يوم يحط اكة الكرسي لزرق و يبدا يشيع في المواطنات على امين وعلى اليسار...صحة شرببتك يا سعيد  




المهدي غصرة نجل باعث القناة...فطر رمضان السنا خاطروا يفلم برشة في مسلسل نجوم القايلة 3 : تذكير جميع الأسلحة إلي ريتوها في المسلسل صنع محلي...مايدين إين نصرة (made in nassra ) ...صحة شريبتك باعث القناة جونيور (junior )  


عبد الوهاب عبد الله فطار عام السنا...خاطر عدا رمضان كامل في ڨلبو...و الله أعلم عليه فاش يصنع...صحة شريبتك سي الفار  






دوس سانطوس الباصق...فطر رمضان السنا على خاطرو بصق بصقة جات في شوربة خالد القربي...عيب شنوا هذا يا سخطة...صحة شريبتك يا بو رقبة معوجة         


خالد القربي المبصوق عليه...فطر السنا خاطر جايبها عاقل و أنا الطفل النظيف...وهو أكبر منافق على المستطيل الأخضر...صحة شريبتك بالوافي خالودة           


أهوى المحقق كونان وساعات يولي كي المحقق داريك بو كعبورة...فطر رمضان السنا خاطر عمري ما ريت عش طائر كما إلي عندو هو...صحة شريبتك عش الطائر               



الفاهم مع كل احتراماتي ليه باش يقعد كل رمضان يفطر مادموا يمثل...قمة المصاتة و البلاهة حاجة فوق العقل...صحة شريبتك يا فاهم              

الشيخ مورو...فطر رمضان السنا خاطر ملي كان شكرا باعث النهضة...ولا شكرا باعث القناة...صحة شريبتك يا شيخ مورو 


عماد الطرابلسي...فطر رمضان السنا هكاكة شماتة فيه و نتبلى عليه و عرظلي في دورة و يحرز رمضان و لا راني قتلك كلمة أخرى يا ط...يا طبال...مستانس قبل كي تجوع تاكل السنا كي تجوع تزيد تجوع...صحة شريبتك يا بوطي  


فوزي البنزرتي...فطر رمضان السنا خاطر الكليب هي ناقصة و زاد جاها شكون باش يزيد يدخلها في حيط...فاطر على برشة حاجات سي فوزي الكفر، الكورة متع ناس قبل، التكتيك إلي مافماش...برى صحة شريبتك سي فوزي          






تي مل اخر و على اخر صحة شريبتك بالمسبق يا بسيس...و هنا نستاناو فيك الكل في صراحة راحة متع سمير المووفي...صحة شريبتك حتى كان ما تستهلهش   





كملت القائمة و وفات... متع جماعة الفطارة وألي عازڨينوا السنا...و أنا هاني بالمرصاد كان نفيق بجماعة اخرين...و ماكم تعرفوا كلوف الشياب سيرتو متع بابا عزيزي 2.0.

حاسيلو إلي باش يقرا البوست هذا لازم يخرج لسانو قبل باش نشوفوا فاطر ولى لا...جيبوها برجلة خير مايجيكم البوليس الصيامي : 


أنا بوليس صيامي...و عزڨة لا تعرفني 


نجم نكون صحيح ماكانش راهم غلطوني ولى راني عزڨتو رمضان السنا تحت الحيط...

baba 3zizi 2.0

الاثنين، 1 أوت، 2011

أحمد فريعة...الكابو متع قلبان الفيستا






  (+) كان عجبتك التصويرة، تعمل مزية تعطيها علامة جمع 
 (-) كان ماعجبتكش...سورري، على خاطر جوجل ماخممش في حكاية الإلا 
 (bingo) كان التصويرة أفحمتك...علق و بارتاجيها على حيوط شبكات التلاقح الإجتماعي 

نجم نكون صحيح ماكانش راهم غلطوني  ولى راهم فرعنوني ...  


baba 3zizi 2.0