موتور تنسنيس

الثلاثاء، 31 ماي، 2011

بابا عزيزي و المجلس التأسيسي...

المجلس التأسيسي...حفلة على غفلة 

المجلس : التأسيسي، التفصيصي، الإشتراكي ، التخليصي، التكديسي، الترقيعي، التخديمي، التقديمي، التفسيخي، التجميلي، التنهيضي، التعقريبي، القرصاني، التحليلي، التمجيدي، ،التحسيسي، الديمقراطي، التخصيصي، الوطني، التغشيشي، التكتلي، التخصصي، الشعبي، الشعباوي، التكحيلي، اليساري، التفليمي، الجمهوري الثاني، العمالي، الأفاقي، الشيوعي، التوافقي، التناحري، التنزيهي، التجعيلي، التركيبي، الترصيصي، التقديسي، التحسسي، التأميني، اليميني، التفعيلي، المرسكي، المفسكي، التخطيطي...

هاذي الكلها أسامي نجموا نطلقوها على مجلسنا الموقر إلي باش يتلهالنا بالمرحلة القادمة متع تونس. حبيت نحط لاسامي مخلطينن و ماهمش منظمين بين الباهي و الخايب، باش ماتقولش راهو بابا عزيزي ضد المجلس هذا... لحكاية و مافيها إلي رايي فيه... لاهو لاهو...

في لمحة تاريخية على المجلس التأسيسي، نرقاو إلي : وقع انتخاب أعضاء المجلس القومي التأسيسي يوم 25 مارس 1956 و قد فازت الجبهة القومية بكل المقاعد برئاسة الحزب الحر الدستوري الجديد و مشاركة المنظمات الوطنية المتحالفة معه (الاتحاد التونسي للشغل، الاتحاد التونسي للصناعة والتجارة، الاتحاد القومي للفلاحين الذي تمّ تأسيسه في 2 ديسمبر 1955... تولى المجلس القومي التأسيسي طيلة عام و عشرة أشهر وضع دستور في إطار النظام الجمهوري صادق عليه نواب المجلس في قراءات ثلاث خلال الفترة من الخميس 30 جانفي 1958 إلى الخميس 25 ماي 1959، استغرقت ست عشرة جلسة...والباقي تعرفوه...

كم أنت كبير يا أبن الخضراء " بابا عزيزي 2.0 " حتى المجلس التأسيسي عندك ما تقول فيه؟ أي نعم أول مجلس تأسيسي تعمل كان عمري وقتها 30 سنه و هذاكا علاش نجم نحكي. مانيش محامي كيما سي الباجي قايد السبسي و لا قاضي كيما سي فرحات الراجحي...أما باش نعطي رايي في الموضوع بكل صراحة و بنظرة سياسية بحتة.

في العفسات متع المرة هذي باش نطرق لزوز نقاط مربوطة بالمجلس التأسيسي و حول مهمتو لولا : إلي هي تحرير دستور جديد.
الرجاء تلهاوا بي :

  • العفسة لولا :أهم حاجة في دستور الجديد هي الفصل الأول إلي يقول :" تونس دولة حرة مستقلة ذات سيادة، الإسلام دينها و العربية لغتها و الجمهورية نظامها".

ها الفصل كثر عليه الكلام، كثر عليه زادة الخلاف في حين هو حاجة مسلمة. مع كل احتراماتي للناس إلي تحب تبدلوا نقلهم من الناحية القانونية ما تنجمش خاطر على هذا الأساس تونس استقلت. و من النحاية الثانية، ما ينكر في اصلو كان الكلب حاشى إلي ما يستاهلش.

النقطة الثانية صار خلاف بين إلي يسميوا رواحهم " اسلاميين " والجبهة لخرى إلي تسمي روحها " الائكيين ". ساعة أول حاجة كلمة " اسلاميين " نقعد باهت كيفاش لتوى لعباد الكل مازالت تحكي بيها في حين هي كلمة أصلها عمك صام و لي بيها يحب يرد المسلمين الكل تنظيم قاعدة متع بن لادن. أما كلمة " الائكية " تقصد فصل الدين على السياسة و تاقف غادي و لي يقول غير هذا راهو منسلخ و موش فاهم شي. أنا نفضل كلمة تونسي خير منهم الزوز. مسلم ،مسيحي و لا يهودي كلنا توانسة

توا باش نرجع للفصل الأول باش نفسرو بالحروف...اش باش نعمل مادام لعباد ضاهر فيها عمرها ما دخلت مكتب و طلعوا من جماعة محو الامية.

برنامج محو الأمية : بابٌ...بقرٌ
     
"تونس دولة حرة مستقلة ذات سيادة، الإسلام دينها و العربية لغتها و الجمهورية نظامها". حرف الهاء إلي تعاود برشة في الجملة، يعود على ضمير متع تونس أش معناها الكلام هذا ؟ معناها الإسلام دين تونس وحدها موش الأشخاص...الفصل ما قالش الإسلام دينها و دين جميع المواطنين...مل اخر كل حد حر في ديانتو أما تونس كبلاد راهي مسلمة بسيف على الجميع.  

أنا بالتحليل هذا مسحت شوارب إلي يسميوا رواحهم اسلاميين و لائكيين...أون بليس، حجمتلهم. خاطر إلي عندو مخ يقرا مليح قبل ما يبدا يعيط. الله يرحم فم اردوغان "إلي يدعي سي راشد الغنوشي يشبهلو في تخمامو" :" نريد حريات دينية...وليس دولة دينية"

وهنا يوفى تحليلي للموضوع خطرني وصلت للمرحلة إلي فيها وليت نفهم بالقمع إلي نصبوا بيه الزيت. 

  • العفسة الثانية : يبدا التصليح من الفصل الثاني. علاش قلت كلمة تصليح خاطر لعباد ماشي في مخها إلي بالحق باش يتعمل دستور جديد من مرحلة الصفر. الحقيقة غير هذا و هذا رايي البسيط. على خاطر كان باش تعمل فيترينا جديدة ،كيما إلي عندي في الحانوت متع البسيسة، تنجم تعاود ترجع الحنوشة إلي باش يبربشوا الدستور... عباد كيما الحبيب بورقيبة و لا زين المبربشين

لحكاية و مافيها إلي الأعضاء المنتخبين باش يبداوا خدمتهم بتصليح الثغرات الكل إلي تعملت في دستور 1959...ثغرة ثغرة، غلطة غلطة، تبربيشة تبربيشة. الغاية من الشي هذا نبدوا من باز صحيحة إلي هي الإستقلال...و منها نراجعو رواحنا في إلي غلطنا فيه وخلينا لعباد تركب علينا...قبل كنا نمشيوا على أربعة ساقين توا لازمنا نمشيوا كان على زوز باش حد ما يركب. 

إلي ينادي بجمهورية ثانية أخرى، راهو انسان سامحني فيه. على خاطرو نكر في حاجة اسمها تونس و عيب نعطيوها إسم جديد غير إلي عندها. تونس تبقى جمهورية أولى و ماهاش باش تولي في الحالات الكل جمهورية ثانية.

ملاحظة أخيرة :  المجلس التأسيسي، ما يلزمش فيه أغلبية مطلقة. هذا فيه خطر على بلادنا و ينجم إلي يتمتع بهل الأغلبية يزيد يرجعنا بتوالي و يعملنا دستور على قياسو... 

انشالله المجلس التفصيصي...نقصد التأسيسي ما يبارولناش 

في ختام التحليل ، رايي في المجلس التأسيسي بيه وعليه، لأني أنا ضد جمهورية ثانية أما مع التصليح على العظم في عوذ التكسير على العظم. على خاطر موش كل شي خايب في بلادنا...تونس باهية أما إلي حكموها خايبين و سراقة.

أمنيتي... توا تصير الإنتخابات في وقت إلي باش تتفق عليه الناس الكل. تاريخ 24 جويلية ماهوش حياة أو موت مافيها باس كان يتأجل باش نضمنوا " التبلفيط لا ". 

نجم نكون صحيح ما كانش راهم غلطوني ولا خذيت بلاصة في المجلس التأسيسي...

baba 3zizi 2.0

الخميس، 26 ماي، 2011

بابا عزيزي و طارق المكي...

طارق المكي...كم أنت نبار ممتاز على المندسين  


تبعت خطاب بن يمين نتنياهو كلمة كلمة...كنت في بالي بش نكتب حاجة على الموضوع هذا مبعد بدلت رايي و قتلي بدلت قناة باعث القناة. أول مرة نجمت نفوت درج منغير ما نزابي و نحط روتانا سياسة. البرنامج إلي شدني ليه اسمو كان صدقني ربي : حوار في العمق... و لا في الصميم... نسيت.

الضيوف على غير العادة، ضيوف مثيرين للجدل : سي طارق المكي و سي عبد الوهاب الهاني (هاني عل الاخر ) زعيم حزب المجد و التمجيد.

عندي مديدة ملي بديت نتبع في طارق المكي، و عندي مدة زادة ملي بديت نبدل في فكرتي عليه. باش ما نكذبش كنت قبل نبخر بريحتو. تفرجت في الفيديوات متاعوا للي خرجوا من خشمي. كنت نقول ديمة شبيه السيد هذا من عام 2008 و هو مارجنا و قلت زادة باز على خاطر مقصوه الطرابلسية. هاذاك علاش هو واحل مع تونس. قبل الثورة كنت نسميه إنتهازي و بعد 14 جانفي راكب على الثورة. أما الفترة إلي "بعد بعد" الثورة عطاتني وجه اخر شنوة هو ؟ طارق المكي هو من القلايل إلي برسمي تقول عليه سياسي. برشة عباد باش تتصدم ملي قاعد نقول فيه أما نتحدى أي واحد ينجم يقول غير الكلام هذا وسيرتو بعد ما نبدا التحليل...

قبل ما نبدا بالعفسات، سي عبد الوهاب الهاني كي خذا الكلمة دشنها بفازا ركيكة ماعجبتنيش...قال : سي الباجي قايد السبسي عمرو 85 سنة و ماعاتش يقدر على سياسة قال شنوة هرمنا هرمنا....بفففف. كاينو سبني أنا شخصياً، أنا بيدي عمري 85 سنة، و مع كل احتراماتي ليه سي عبد الوهاب الهاني، العمر هذا هو عمر النضج السياسي معناها مل الاخر نقص مل بلا بلا...BlaBla

باش نبدا توا بالعفسات، شوية تركيز و شوية تعقل :    
   
  • العفسة لولا : سي عبد الوهاب الهاني...ممم ،حاسيلو أنا خلطت على كلمة طارق المكي إلي حكى فيها على الاحزاب. المكي حكى كلام في بلاصتو، و خلاني نخمم في الأمور بمنظور اخر. بعد دكتاتورية زين الدكاترة و دكتاتورية الشعب "نقصد فيلي يراوا في رواحهم زعماء مزعومين"، جات دكتاتورية أخرى اسمها : خاطر زين المضطهدين اضطهدني...عندي ألحق نحكي بإسم الشعب. خلاصة المداخلة الأولى متع طارق المكي :

يا احزاب الهانة و الغلبة ماكم تحبوا تخدموا سياسة ؟ يا أخي وضحوا تاريخكم ساعة قبل كل شي. عملية ذكية متاع راميان معنى على عبد الوهاب الهاني برشة... 

و لا و أني ما نحبش برشة نجبد تاريخ العباد أما مافيها باس نذكر الناس بشوية حاجات. إلى الأمام... فيديو  فيديو :

يا هاني برشة...مل الحقوقي للسياسي...صعيب ياسر يكونوا غلطوك  

رد عبد الوهاب الهاني برشة على إلي قالو في الفيديو حاجة تضحك بالحق. قالك نحنا  ( يقصد في روحو وأنصار حزب المجد و التمجيد)  كي كنا حقوقيين، كنا مطالبين كان بتحليل خطاب زين الخطباء منغير مانمسوا من الهيبة متاعوا. هاو مرة أخرى عمل فازا ركيكة. قال شنوة هو محلل فني معناها يحب ياخو بلاصة بابا عزيزي 2.0 : المحلل الحصري على الواب. يا جماعة الأحد الرياضي، رقيتلكم شكون خير من خالد حسني هاو سي عبد الوهاب الهاني برشة. شبيك راهو عجبتو فازت زين المغلطين كي قال راهم غلطوني...زح صدقها برسمي ؟ و لا حب يغطي على زين المغطين كيما عمل صحيبو برهان بسيس...إلي رصاتلو شاد الدار مايخرجش و دورها مسلسلات.

طوال تحليل العفسة لولا، خلاصة القول : ماو زين المعذبين عذبك و برك عليك، وضح مالة تاريخك مبعد ايجا غني كيما العصافر الكل.

  • العفسة الثانية : هاذي مش مربوطة بالبرنامج إلي تفرجت عليه في قناة باعث القناة. بورصة الأحزاب تقول إلي سعر الإقفال بالنسبة لعدد الأحزاب 80...قادر على التحسن. الحاصل ها السبعين إلي يعايطوا في المنابر على الحكومة و يحبوها تستقيل و درا شنوة ولي يناديوا بالتشغيل و تحسين الإقتصاد. بربي سؤال للعصافر الثمانين : فماش واحد منكم حضر مخطط إقتصادي و تشغيلي صحيح و على قاعدة ؟ اش قدمت إلى الناس؟ اه و لا حقا انتوما لاهين تتناحروا شكون يركب خير على الثورة...سامحني على البهيم.

المشكلة كبيرة و حتى لتوا ماريت حتى حد جدي فيها الحكاية. إذا بايا نفيق بالبروجرام متع طارق المكي ولي نراه أنا ،حسب راي الراجل الكبير إلي عمرو 85 سنة و لي مايفهمش كيما قال عبد الوهاب الهاني برشة : بروجرام ذكي، طموح، دقيق، موجه و لي أهم يخدم على المدى البعيد...

الفكرة الإقتصادية متع طارق المكي هي تقسيم تونس للفيديراليات. هاي بشوية شبيك دز !!! اصبر نفهمك يا وليدي. التقسيم هذا متع الأقاليم موش تقسيم سياسي (كيما يحبوا في العراق)، لا تقسيم البلاد يكون على أساس اقتصادي يتمركز فيه ثلاثة اقليم : الشمال،الوسط و الجنوب. كل فيديرالية تاخوا إختصاص معين وهكذا داواليك. نعرف إلي الحكاية موش ساهلة أما ما تنساوش إلي البروجيه راهو على المدى الطويل و من أهدافوا القضاء على الجهويات و تولي كل ولاية تحكم في مصيرها الإقتصادي...زعمة ماهوش حل ؟ 

طارق المكي يزيد يفسرلكم بالفيديو :








يا أخي ما ناش خير من ألمانيا باش نقولوا لا لمشروع كيما هذا... 

نقطة أخرى، حكاية التشغيل مهمة برشة، حسب كلام طارق المكي، سيرتو مايلزمش التفرقة بين أصحاب الشهائد العليا أو محو الأمية (حقيقة فقت بيها مخر)  و بين العاطلين على العمل إلي ماعندهمش شهايد خاطر حتى هوما عندهم الحق.

خلاصة الحديث، طارق المكي لعندي معاه لا حرثة لا ورثة و حد ما ظغت عليا باش كتبت الكلام هذا. بابا عزيزي ما يتأثر بحد.

كلمتين نحب نقولهم إلى طارق المكي : وريت بالحق إلي إنت سياسي محنك و طلعت فرد حكة إلي أنا جيت منها حتى كان أكبر منك. نحب نقلك إلي ماذبيا نراك نبار سياسي من الدرجة لولا موش رئيس خاطر نحبك شوكة للبلعاطا و الفشلامة... أما مادام فما برنامج سياسي واضح و بروجيه إقتصادي طموح يضهرلي فكرة تأسيس حزب حركة الجمهورية الثانية وارد ياسر. و بنسبة لموضوع  الدوسيات متاع المعارضين إلي في داخلية، إن زادة كيفك نحبهم يتحلوا خاطر كان يتحلوا باش تراصيلنا نقسموا عدد 70 على روحو و النتيجة صفر حزب سياسي يقعد...   


يا طارق يا مكي...أحسن حاجة فيك موهبة التنبير السياسي أما رئيس...   

ملاحظة : لست انتمي لأي حزب، مجرد راي سياسي بعيد عن كل الحسابات و المؤامرات...بابا عزيزي و في للمبدأ متاعو "السياسة ماهاش عاطفة".

نجم نكون صحيح ماكانش راهم غلطوني و لا وليت هاني برشة...      
                                                        
baba 3zizi 2.0

الاثنين، 23 ماي، 2011

بابا عزيزي و دومينيك ستروس خان...

دومينيك ستروس خان...على خاطركم... نبزنس

اه من السياسة و لي يتبع السياسة...كي لعباد الكل قاعد في حانوتي متاع البسيسة و إذا بيه نسمع في الأخبار مدير بنك النقد الدولي...دومينيك ستروس خان...مورط في تبزنيسة مع سبق الإصرار و الترصد تبعها إعتداء جنسي على الفام دو ميناج (عاملة النظافة)...اوفيليا الغينية.

تي شنية الحكاية و برى مدير النقد الدولي، حادثة عادية عند برشة أما الحقيقة غير هذا. بابا عزيزي شام ريحة خنن و سيرتو تخديم مخ.

ستروس خان حسب ما فركست عليه على الواب و التكنولوجيا الحديثة، طلع عندو سوابق قبل مع الريق هذا. وحدة من الموظفين متاعوا قبل قالت إلي هو كثرلها بالعسول برشة. هاذاك علاش هي حلفت باش ماعاتش تقعد معاه فرد بيرو وحدهم...السيد بزناس يا بو قلب. الكلام هذا قالوه في صحافة فرنسا ماجبت شي من عندي خاطر لاهو ولد عمي و لا يقربلي باش يحكيلي لحكاية هاذي. باش نكونوا واضحين.

بابا عزيزكم دخل تران (Train) في مخو...خاصةً بعد ما تفرج في الجلسة الأولى متاعوا قدام القضاء متاع مدينة منهاتن. علاش في الوقت هذا بذات ياخي موش كايانا في 2011 ؟ علاش ستروس خان بذات ؟ و علاش لحكاية و لات قضية رأي عام ؟

هذا الكلو تعرفوه كان مع المحلل الحصري على الواب بابا عزيزي 2.0 و لي يقدم تحليل ببلاش لعلى و عسى البسيسة متاعوا تزيد تتعرف على مواقع التراحم الإجتماعي. العفسات رجعوا بعد ما غابوا وتحليل باش يبدا توا...التركيز الكلي يعيشكم :

  • العفسة لولا : ياخي شبيني ملي سمعت لحكاية أول مرة و انا حاس إلي فما خشم كبير شوية داخل في الحكاية. في العالم هذا عرفت زوز خشومات : لولاني خشم جورج بوش إلي دخل في حروبات الدنيا الكل...و الخشم الثاني بففففففففف تعرفوه يا ناس لازم نقول اسمو ؟ أهوكة بالأمارة المرة هاذي كثرلها. تي شبيك الراجل و لا يمخور و يشم وحدو. برى عاد باش تلزوني نقول اسمو : خشم ساركوزي دايور (d'ailleurs)...حتى التوا أكبر خشم ريتو واتو نتلها بيه نهار انشالله ....
 
باع و ذراع و خشم قادر... على الإمتاع   


المهم، الفراضية السياسية تقول إلي خشم ساركوزي محشي في حكاية ستروس خان. اسألني علاش نقلك يا بابا 2012 فما إنتخابات في فرنسا.ستروس خان هو زعيم الحزب الإشتراكي الفرنسي إلي مرشح بقوة في تمقيص ساركوزي في الإنتخابات الجاية.

إن بعض الظن إثم... أما الشك بنسبة 99.99 % إلي هو لعب الملعوب. ساركوزي يسال من و ينو مغرفة لستروس خان و هاو رقا فرصتو. التبهليل و التبلعيط متاع ساركوزي مخبي وراه شخصية أول حاجة عندها وزنها في العالم...شبيك السيد بيستونات و زيد على هاذاك السيد معارفو تابعين الحركة الساينتولوجية.

حسب تحليلي و ماهوش ملزم، ساركوزي ربط بهيمو مع العام صام إلي المرة هاذي تعشى على ستروس خان "موش بن لادن"، حاسيلو مصالح مشتركة : الأمريكان ناوين على بنك النقد الدولي بعبارة أخرى يحبوا أمريكاني على راسو. و ساركوزي يحب يكسر المنافس متاعوا في الإنتخابات.

كي تتلم المصالح الوسيلة تولي مبررة والطريقة الوحيدة هي تشويه صورة ستروس خان...للتذكير الوسيلة متع الفضائح الجنسية إختصاص ماسوني و ساينتولوجي وفي حالات تنجم تسميه إختصاص جربوعي.إن بعض الظن إثم ....

نشالله ماصعبتش في كلامي و فهمتوني في العفسة لولا خاطر كان باش نتوسع في الحديث راني باش نهزكم حتى للذهيبة...الموطن الأزلي لخميس بوبطان.

  • العفسة الثانية : الفتاة الموقرة اوفيليا... اه و لا حقا نسيت موش طلعولها اسمها...قلك البنية اسمها نافيساتو ديالو (غينية). البنية هاذي لعباد قاعدة تحكي عليها و ولات أشهر من لطيفة العرفاوي. احنا في تونس نسميوها ركوب على الثورة و في حالتها هي ركوب على الأحداث. إلي مهبلني حتى لتوى ماظهرتش قال شنوة الشرطة متع (CSI ،NCIS، NYPD) و المسلسلات الكل متع عمك صام، مخبينها عندهم خايفين عليها. هاو مرة أخرى بابا عزيزكم عاود ركبوا الشك. منشيش تطلع هي زادة مافماش منها وشخصية مصطنعة كيما لوليد بن لادن ؟ و إن بعض الظن إثم ....

بية الذيبة و نافيساتو ديالو...وجهان لعملةً واحدة   

  • العفسة الثالثة : العفسة الثالثة فيها زوز حاجات. باش نبدى باللولة، لحق عندي مديدة ملي كملت مسلسل لوست (LOST) أو الضائعون. ما فيباليش إلي فما سيري جديدة اسمها "نهار عليك في المحكمة". وحدهم الأمريكان فريمون فكروني في سيري أخرى بوسطن ليقل (BOSTON LEGAL ) أما الفرق : الممثلين موش هوما بيدهم و تنجم تصدق برسمي إلي هوما يحكيوا بجدهم و حقنين.

تعليق بابا عزيزي 2.0 على الحكاية هاذي هو الاتي : مبروك للامريكان الإنتصار المعنوي على الفرنسيين...مل اخر وصلوا للفرنسيس راكم ولادنا...و إن بعض الظن إثم ....

الموسم الأول من السيري الحدث...نهار عليك في المحكمة


النقطة الثانية، في صورة ما خرج منها نظيف دومينيك ستروس خان، ساركوزي مارتو كارلا بروني "إلي ما يستهلهاش" باش طلقوا. ثاني حاجة باش ترصيلو يفركس في دار للكراء كيما عمل زميمو شيراك. ثالث حاجة باش ياكل كابوت...اه سامحوني باش يشري كبوت مل الفريب. و بيان سير إن بعض الظن إثم...
 
في تلخيص لثلاثة العفسات متاعي، أنا نرى إلي لحكاية مدروسة بالقوي. كان برسمي لحكاية تطلع مؤامرة "كيما إلي عنا في تونس من الصباح إلى الليل"، راهم لعبوا على نقطة ضعف ستروس خان إلي هي التبزنيس. أما موش في الحالات الكل تنجح لحكاية...خاطر الأمريكان ماهم خاسرين شي...أما الضبع إلي ممكن دور عليه لومور هو ساركوزي...خسارتو عبيط و قصير وخشمون...


نجم نكون صحيح ما كانش راهم غلطوني ولا خشمي و لا كخشم ساركوزي...
baba 3zizi 2.0

الخميس، 19 ماي، 2011

بابا عزيزي و تنظيم القاعدة...

... بابا عزيزكم عندو قولة يحب يكبس بيها الإرهابين : أنا خردوق و تنظيم القاعدة لا يعرفني 
 
تونس تعيش فترة صعيبة برشة، حك راسك تجينا حكاية من الحيط. توا كنت نشوف في الفيسبوك، نرقى جماعة يحكيوا : قالك العناصر الإرهابية إلي حبت تدخل تونس عن طريق الروحية و السبيبة...هوما جماعة مخلصينهم التجمعيين باش يخلوضوها...لا تعليق على اللغة اللوحية...

جماعة اخرين، هاذم عاد قاتلهم اسكتوا، أنصار بن لادن الحوتة، قلك ربي إنتقم من الجيش التونسي وكتب الشهادة لل...الكلاب حاشى إلي يقرا في الأرتيكل.

جماعةاخرين نسميهم أنا جماعة المؤامرات و المهلوسين...قالك الحكومة تعملنا في فزاعة الإرهاب درا فاش تحضرلنا !!! بربي موش خور !!! أباي ناس موتى وعايلاتهم في حالة و الشعب لاهي في التفلسيف ... مانحكيش عاد على جماعة الكورة يعن بو... كل فول لاهي في نوارو وغني يا عندليب يا دعوب...

بربي رانا ماناش ناقصين على الأقل عاونونا بالسكات، تونس حرمة ترابها قاعدة تنتهك و الناس تفلطي. يا ناس افهموا راهو ما فماش كان التجمع ناوي على خلاها أما فما 100.000 ألف تنظيم و ميليشيا ناويا تقطع علينا اللحم و الخبز مل الحومة...

البارح 18 ماي 2011 ، استشهدوا ثنين من أعوان الجيش :الكولونيل طاهر العياري و العون وليد الحاجي...الله يرحمهم وينعمهم .

ما فماش عفسات المرة هاذي...بابا عزيزكم 2.0 المرة هاذي موش في صحنو جملة. باش نحكي إلي في قلبي و اكهو.

باهي قبل كل شي، تسمية تنظيم القاعدة تسمية متع عمك صام الأمريكاني و أنا مانمنوش. هذاك علاش باش نعطي تسمية متاعي : تصاور الأمريكان.

علاش سميتهم هاكا خطرها هاذيك الحقيقة. تسألني علاش قلت هاكا نجاوبك وليدي. تونس من البلدان القليلة إلي ما فيهاش قاعدة عسكرية أمريكانية. عمك صام عندو قرابة 700 قاعدة في العالم...معناها نسبة 70 % من العالم هي متواجد فيه. الثقافة الأمريكانية تقول : هناك دائماً عدو يجب مقاتلته...و عليه... المارينس هم في حرب أبدية. ماعينش باش ندخل برشة في التفاصيل أما نحب نذكر لعباد في طالبان وشكون دعمهم باش وصلوا خذوا الحكم في أفغانستان. أهوكا الأمريكان خاطيهم عاد.  

شمعناها تفسير كلامي معناها العام صام بدا بالقناصة و يحب يكمل الخدمة بالقاعدة و يوفى بقاعدة عسكرية في تونس. في جملة الإرهاب هو صناعة أمريكانية.

توا الأمريكان باش يتكلموا و يبداوا ينصحوا في توانسة  على الإرهابيين، شبيك راهم اليوم خلقوا شخصية جديدة باش تشد تنظيم القاعدة قالك اسمو سيف العدل. مممم....معناها هذا البيديجي (PDG) الجديد متع تصاور الأمريكان...تفرجوا معايا على هل المشطرة الجديدة إلي ممكن يكون فوتوشب CS 10 .قالك السيد هذا هو المسؤول الأول و الجديد على الإرهاب و  على عسل الفرززو  في العالم !!!

شو حليلتو، فرتل الفرخ ياوالله نبتلو الزغب في وجهو...ستنا ساعة ماكش فوتوشوب ماو؟ 
      
بالنسبة لموضوع الإرهابيين التوانسة ولي غير توانسة إلي يحبوا يدنسوا تراب تونس. هذوما ناس غلطوهم الشيفان متاعهم : بن لادن و تصاوروا .جدت عليهم برسمي فما حاجة اسمها جهاد لايامات...راني هرمت : ياخي فما واحد يجاهد خوه المسلم ؟ مش فيبالي جهاد النفس هو أول جهاد في الإسلام...تفيه عليكم حتى ديننا تحبوا دنسوه.  

بربي سؤال يا مجاهدين الهانة والغلبة...كي نقلكم راهي إسرائيل تمحق في الفلسطينيين شنية تقولوا انتوما ؟ ويني الرجولية متاعكم ماو وريونا عضالاتكم مع الأسرائيليين ولا يخوفكم ؟

بففف...........مل الاخر و عالاخر متفرحش تونس بلاد ما تحبش تصاور الأمريكان و لا الفاتشا متاعهم. بدينا ثورة ضد زين الإرهابيين و مستعدين نكملوها ضدكم انتوما.

تحية إجلال و إكبار لجميع الأجهزة أمن و حرس و جيش منغير تفرقة، إلي بيهم نحسوا بالأمن وربي يعاونهم. و مرة أخرى نعزي عيلة الشهداء الأبطال. تحية أخرى للمواطنين إلي سمعت عليهم كلام يقشعر البدن من الفرحة... ناس تقاوم في الكرطوش متع الكلاشينكوف بالحجر...زايد مع التوانسة بديناها مع زين الكرتوش الحي و توا مع تصاور الأمريكان...شابو ليكم يا توانسة.    

نجم نكون صحيح مكانش راهم غلطوني و لا وليت تابع جماعة تنظيم القاعدة...   

baba 3zizi 2.0

الاثنين، 16 ماي، 2011

بابا عزيزي و هيثم المكي...

براس لحنينة يا هيثم كانك ماسوني...بلاهي فرهد على قلوبهم... هههه

كيما لعباد الكل تفرجت في الفيديو متع هيثم المكي...إلي رد فيها على الجماعة متع الفيسبوك...ولي نسميهم أنا "اتحاد صفحات الفيسبوك" هذا مبدئياً و مبعد باش نعطيهم إسم اخر. باش نكونوا واضحين كيما العادة، بابا عزيزي 2.0 يهرب من حاجة اسمها عاطفة و مايحكي كان بالمنطق. هيثم المكي لاعندي معاه لا حرثة و لا ورثة ولا يقربلي لا من بعيد لا من قريب. وحتى معرفتي ليه ماهاش شخصية...أما معرفة على الواب 2.0...و ما وليت نعرفو إلا ماريت خدمتو عندي عام هكاكة على الواب وزيد حكاولي عليه صحابي (شياب كيفي أما جماعة الواب 1.0 ). 

بون هاي الفيدو متاعوا وانتوما احكموا ...

بديت بالمقدمة هاذي متع إبن خلدون، باش ما نبداوش نبلبزوا و نغلطوا في بعضنا. باش نحلل لومور كي العادة ونعطي كل عبد حقو ولي ماعجبوش رايي فما 3 أنواع متع رد كيما قال سي حمد المغيربي : يا يقبل رايي و يسكت خاطر اقنعتو، و لا يعطيني رد و نشوفوه يقنعني و لا لا، مكانش كان راسو صحيح و لا عبلي فيها يفهم و ما عليه كان يتعلم يلعب خربقة و مبعد يجي يحكي مع بابا عزيزي 2.0...

يضهرلي طولت عليكم أما الله غالب...قلبي معبي على برشة فشلامة. باهي باش نبدا تحليلي كي العادة...يلا بينا يلا : 
 
  • العفسة لولا : كلنا خدمنا على الويب ماركيتينغ...أوه نسيت يلزمني نقص من الرومي...نقصد التسويق عبر الواب. وكلنا نعرفوا كيفاش نزيدوا عدد لي فان و لا الأحباء متع باج فيسبوك. و نعرفوا زادة شنية يلزمنا نعملوا باش الباج ماترقدش...ولي هي تحضير بوز بأي طريقة حتى كان مسخة حاشى إلي ما يستاهلش. كيما قلت قبيلة باش نسمي الأشياء بالموسميات متاعها. المشرفين على باجات الفيسبوك المخربة حسب رايي، ما نيش باش نذكر لاسامي حتى نعمل طلة عليهم الكل، وأكيد فما بوست صغرون باش يفرح بيهم، المشرفين هاذم باش نعطيهم إسم شلايك لابسين رواحهم والباجات متاعهم باش نسميهم...مممم...اتحاد صفحات الركاكة و التبلعيط... المخربين هاذم تنجموا تفهموا طبيعتهم في أرتيكل كتبوه ناس اخرين...أعمل طلة وجيب معاك باكو غلة.

الشلايك لابسين رواحهم حبوا يعملوا بوز على اتحاد صفحات الركاكة و التبلعيط، عن طريق تشويه تصويرة انسان معروف كيما هيثم المكي، خدام برشة و عبد عندهم فيه الناس ثقة. يا ربي على البهامة...في صغري كي كنت شباب، والدايا ديمة يوصيوني... رد بالك تخمم في حاجة من منظورك إنت كهو، شوف زادة لعباد كيفاش تخمم. مع كل احترماتي للشلايك لابسين رواحهم و لإتحاد صفحات الركاكة و التبلعيط متاعكم... راكم بهايم واسمعوها من راجل كبير خير.




أنا كان جيت كيف هيثم المكي نفرح، كي نرقى عباد تعملي البوب ببلاش. يسخايلوا كي كلاشاوه باش يحطموه...و هو في الحقيقة زادوا شهروه و لعباد زادت خذات ثقة أكثر فيه و أنا متأكد إلي الشهرة هاذي هو ماحجتوش بيها... خاطرو انسان مايلوجش على التفاهات متع الشلايك لابسين رواحهم. 





اه يا جماعة "اه منه منه" ملي كنتوا تبارتاجيوا في الفيديوات هاذم... توا واليتوا تفهموا بوليتيك...


ملاحظة : الباج إلي مبارتاجي منها الفيديو ماهش تابعة اتحاد صفحات الركاكة و التبلعيط 


صحة ليك يا هيثم كان جيت رقيت عباد تعمل البوب ببلاش...راني سكرت حانوت البسيسة إلي حالها وشد يت الدار. تعبت من الخدمة بصراحة و زيد ظهري وجعني... 
 
  • العفسة الثانية : أنا من الناس إلي تحترم هيثم المكي برشة علاش ؟ أول حاجة عمري ماريت ريفو دو براس...سامحوني أما الكلمة إلي بالعربي جاتني رزينة استعراض الصحافة أما مقبولة. قلت عاد عمري ماريت استعراض للصحافة كيما إلي يعمل فيها هيثم خاطرها حاجة اوريجينال أون بليس بلغتنا الدارجة. معناها معلومة توصل خير و موش ساهل الشي هذا و أنا متأكد إلي هيثم قاعد يخدم في خدمة جبارة ويعطيه الصحة. أنا نقلوا شابو با...معناها طربوشة لوطة إحترام للخدمة متاعك.

حاجة أخرى ولي نراها أهم، نحب نقول للعباد مش ساهل تصدق عبد حتى كان يكون شكون، أما هيثم المكي حسب رايي أنا الشخصي هو مصدر موثوق فيه موش 100 % خاطر مافماش حاجة كاملة...أما وصل لنسبة 95 % معناها السيد عندو إلي نسميوها السمعة الالكترونية أو "e - reputation ".

علاش قلت الكلام هذا خاطروا من القلايل إلي مايقول كان إلي يشوفو...يا ولدي المنطق يقول إلي ماتصدق كان إلي تشوفو الشي هذا ريتو أنا في هيثم المكي.

براف نحب نفسر إلي الراجل الكبير إلي اسمو بابا عزيزي 2.0 ، عمرو ما يجامل حد و ما يتنوفق مع حد كل حاجة في بلاصاتها. مانيش ندافع على هيثم المكي خاطروا بلوقور ومدون كيفي،بون يفكرني في صغري، أنا ندافع على الموضوعية و على التفاني في توصيل المعلومة. و نعاود نأكد مرة أخرى راني لاعندي لا حرثة ولا ورثة معاه...حبيت جيست نعطي السيد حقو و برافو للخدمة متاعوا و بنسبة للشلايك لابسين رواحهم... نقلهم أمشط شعرك تاو نرجعلك...

نجم نكون صحيح ما كانش راهم غلطوني و لا جهلوني...

baba 3zizi 2.0

الجمعة، 13 ماي، 2011

بابا عزيزي و القناصة...


أنا قناص...و الكرتوش الحي لا يمثلني

نعرف إلي الموضوع هذا خذا برشة صيت ملي بدات ثورة 14 جانفي. برشة كلام و برشة تخمينات وخاصةً برشة تفلسيف...

قبل ما نعطي وجهة رايي في الموضوع هذا بذات، لازم نبدا بتعريف صغير لكلمة قناص شنية هي. حسب الويكبيديا ولوني مانيش مغروم بيها برشة : هو الشخص الذي تدرب على إطلاق النار بدقة على الأهداف الصغيرة جدا أو البعيدة، و في أكثر الأحيان هدف القناص هو الإنسان العدو.

معناها المهمة الأولى متاعو هي قنص الأهداف البشرية. جميع الحروب ترتكز على القناصة في تحقيق اهدافها. الغريب في الحكاية إلي لعباد هاذم ولوا يخدموا في إطار اخر اسمو الثورات إلي بدات بيها بلادنا تونس. بلادنا صغيرة وما عاشتش برشة حروب، هاذاكا علاش كي هدوا علينا رعبونا أما ما رعبوش عزيمتنا باش نكملوا الإنتفاضة.

بعد التعريف والمقدمة باش ندخل في صلب الموضوع. فما زوز حاجات تخالفت عليهم لعباد و عندها لحق. ولي هوما : القناصة إلي ظهروا قبل و بعد الثورة ياخي تشدوا ولا لا ؟ هذا السؤال لول...السؤال الثاني. علاش الحكومة أو السلطة المتمثلة في شخص سي الباجي قايد السبسي، قالت إلي ما فماش منها حكاية القناصة !!

شو باش نكونوا واضحين القناصة موجودين و موش واحد و لا ثنين راهم، تبقى توا واحد لازم ياخو لومور بعقلانية ويحاول يفهم لحكاية مليح. وهذا فيديو واضح للقناصة إلي ظهروا في تونس...

 
الفيديو توضح أعوان الأمن يحاوزوا في القناصة  

بابا عزيزكم ما يخليهاش بيكم. و في البوست هذا بابا عزيزي 2.0 باش يوظحلكم لومور ويعطيكم وجهة رايو باش ما تقعدش لومور في المهموتا. عليكم كان تبعوني مليح :
  • العفسة لولا : السؤال لول : القناصة تشدوا ولا لا ؟ باهي باش نكون موضوعي في كلامي وما نبداش نرمي في الكلام، أنا سئلت على الموضوع شخصياً ما تقولش راجل كبير وديما راقد. سئلت عبد قريب ياسر من المعمعة و عاش لايمات إلي بعد 14 جانفي موش كيفنا. مل اخر كان في فم المدفع. سامحوني مانجمش نقول اسمو خاطر فيه خطر عليه وعلى خدمتو و من مسؤوليتي نحمي المصدر متاعي.

المصدر هذا وضحلي إلي فما عدد كبير من المرتزقة والقناصة إلي ضهروا أيمات الخوذة، مشدودين الكل في ثكنة لعوينة. نعرف إلي مش لعباد الكل باش تصدقني أما هذي معلومة نسوقها باش لعباد على الأقل تطمان.

بابا عزيزي 2.0 ما وصل لهل المعلومة إلا ما عرف شنية صار يوم 14 جانفي خاطر لعباد حتى لتوى ما تعرش اش صار بالحق. عندي مديدة ملي تحريت علي الحكاية وعرفت الحقيقة، أما تحفظت إلا ما نتأكد وتأكيد جا من عند سي رضا قريرة (وزير سابق متاع الدفاع في عهد زين القناصين) في تصريح لوسائل الإعلام ...للي فاتو الحوار هاو التفاصيل... تصريحات سي رضا قريرة.

باش نلخص، نحب نقول إلي القناصة تشدوا، ممكن موش الكل أما برشة منهم في قلبو...

  • العفسة الثانية : الموضوع الأهم...علاش الحكومة في شخص سي الباجي قايد السبسي تسترت على لحكاية ؟ صحيح سي الباجي قال إلي مافماش وجود لحاجة اسمها قناصة و صحيح إلي نجموا نقولوا إلي عرف كيفاش يفلت من السؤال. لكن إلي يركز في كلامو ينجم يفهم إلي هو كي قال كلمة "مافماش" راهو يقصد فما. قوة السياسي يوصل معلومتو ضمنياً. المشكلة إلي شطر التوانسة ماهمش لاهين فلي قالو و قبل حتى ما يبدا يحكي، الناس الكل بدات تشتم و تسب...هاذيكا مشكلتنا نحنا التوانسة و العرب مانعطيوش فرصة لرواحنا باش نفهموا تحت السطور...و نموتوا على حاجة اسمها نتبلنجاوا في الحجر !!!

النقطة الثانية ولي نراها أهم قبل ما نحللوها لازم نتفرجوا في الفيديو إلي بعثهالي شخص حاير في موضوع القناصة ولي عاونتني ياسر باش نجم نفهم لحكاية...

للأسف الفيديو تنحى مل الفيسبوك أما نجمو نلخصو في جملة "القناصة مشروع قلب نظام و زعزعة أمن"...  


محلل روسي ماستبعدش إلي القناصة مأجورين...معناها ينجموا يكونوا موش توانسة و هذا إلي أخطر. فرضية المؤامرة الأمريكية واردة برشة حتى كان تنجم تكون موش مؤكدة. أما المنطق يقول إلي الظاهرة متع إلي يقنصوا تواجدت في الثورات الكل وبصفة غريبة و متشابهة. الكلام هذا خطير و لازموا شوية تروي. الحكومة ماحبتش تصرح بالقناصة إلا ماتتأكد منين جايين. خاطر برشة حاجات تنجم تتبدل و قتلي يعرفوا كل قناص جاي من طرف شكون : من زين القناصة ولا من عند أمريكيا...

الخطوة هاذي أنا نراها ذكية حتى كان جات على حساب معرفتنا بالحقيقة أما الازم لازم. باش نضمنوا ماعاتش يرجعوا خصوصاً و لي الأرضية مواتيا برشة و بلادنا ماهاش راكحة.

هذا تحليلي أنا ، مايلزم حد إلي يحب يقبلو مرحبا و إلي ما عجبوش نقلوا حاجة بركة إلي راني "قديم قديم قديم" ولومور هذي موش أول مرة تتعدى علي ...

باش نختم بنصيحة بربي للعباد، حاولوا يا ولادي قبل ماتحكموا على حاجة تاخذوا وقت تفكير كيما نقولوا نحنا مهلة... باش عل أقل ما نزلطوش في الكلام خاصةً في موضوع حساس كيما هذا موش معقول الناس الكل نردوهم تابعين التجمع. إلي يحب يفهم السياسة و ما يقعدش حاير لازامو ياخو لومور بالشوية و يحلل قبل ما يحكم. القناصة موجودين مل اخر وراهم مشدودين و ماعلينا توا كان نسكروا عليهم باش ما يرجعوش...خاطر موش بتحريض والعنف باش نتفاداوهم. هذي نصيحتي لخرة في هل البوست...

نجم نكون صحيح ما كانش راهم غلطوني...

baba 3zizi 2.0

الاثنين، 9 ماي، 2011

بابا عزيزي وسي الباجي قايد السبسي ...

سي الباجي وقتاش الناس تفهم إلي السياسة ماعندها حتى علاقة بالعاطفة

كيما الناس الكل تبعت اللقاء الصحفي المغلق إلي تعقد بحضور سي الباجي قايد السبسي(وزير أول في الحكومة الانتقالية) و إلي تبث على قنواتنا الثلاثة : الوطنية... نسمة وقناة باعث القناة. بابا عزيزي كيما عاتو يحلل لومور موش كيما لعباد. يحاول يبعد قد ما ينجم على العاطفة خاطرها أساس خراب البيوت. و لي يحب يركب العاطفة على السياسة راهو غالط...و مصيرو يضيع فيها كما برشة عباد منهم سي فرحات الراجحي...

كيما عاتي باش نحاول نحافظ على الموضوعية في كلامي حتى كان راجل كبير راني ماننساش حمد الله. حاجة أخرى نحب نقولها إلي رايي موش باش يتبدل و لا نقول فيه باش نشجع طرف ولا غيروا...أما قرأتي سياسية بحتة خاطرني انسان مانيش حساس، عمري ما تفرجت لا في مهند ولا في نور...دونك الصحيح  الصحيح..

كل العادة والعوايد تلهوا وركزوا معايا مليح و على الكلام إلي باش نقولوا المرة هاذي غاية في الأهمية... مازي مالة كيما قال الحبيب ميغالو باش نعطي رايي في أهم ماجاء في كلام سي الباجي  :

  • العفسة الاولى : بان بالكاشف شكون إلي مسيس ولي شكون يسخايل في روحو مسيس. مع سي فرحات الراجحي عرفنا عبد متقلب في كلامو وأخطر حاجة سمعتها في الفيديو ،إلي نسماها أنا بوز بوليتيك، هي قولو بعظمة لسانو إلي مكانش يتصور لومور باش توصل هكا...وهاي وصلت لومور للأخطر ماتصور. 

هنا برسمي يزيني من العاطفة شبعت بيها، ديجا مسلسل نور وفا...إلي قالو سي الباجي قايد السبسي إذا تتناولو بمخ سياسي يتصدق ألف بل ميا. قرار اقالة سي فرحات الراجحي جا على خاطر فما تخلويظ في المسؤوليات و كلمة برومي اسمها (incompétence) . القرار جا من طرف رئيس الدولة و حتى كان مؤقت لازم علينا إحترامو. نعرف إلي كلمة تكذب موش باهية على التلفزة...وخاصةً في شخص محترم كيما سي فرحات الراجحي...أما هو يعرف مليح مليح إلي يزرع الشوك ما يحصد كان الشوك. وبابا عزيزكم 2.0 يكره لعباد إلي تخدم مخاخها على البلاد...والبادي أظلم.

  • العفسة الثانية : فما موضوع لازم لعباد تاقف عليه ويزيها بلا تفليم. ياخي فما حكومة في دنيا هاذي تسيب المرابيط متع الحبوسات باش يزيدوا يهيجوا لعباد عليها. يا ربي راهو شي يجهل مل الجهل. عملها "زين المهربين" قبل و نعرفوا علاش أما توا...فريمون شي ينطق !!! ياخي كيفاش تحبوا المرابيط ما تهربش وما تخربش كي ترى الدنيا خايضة ولي يعسوا على الحبس ولاوا يمثلوا في دور "بيليك" إلي يعس على المرابيط في مسلسل بريزون بريكة. 

فيقو يا ناس !!!

  • العفسة الثالثة : موضوع رشيد عمار...أنا العبد هذا نحترمو حتى كان ما عنديش ثقة فيه و نقولها ماني خايف من حد. أنا تحليلي خاطر للي صار في 14 جانفي ماهوش مربوط بكلمة "لا" إلي نشك فلي قالها. أما رغم ذلك هو رئيس أركان الجيش وواجب إحترامو. بنسبة لزيارة رشيد عمار للقطر، أنا نحب نفهم علاش خذات صيت أكثر ملي تستاهل...ياخي أول مرة عسكري يخرج من بلادو باش يقابل عساكر اخرين. ياخي نبطلوا ماعاتش نتعاونوا عسكرياً مع لعباد ؟ طرف السلاح إلي عنا نكملو بيه !!! هكا ماو المنطق يقول موش كلي بيزار ؟

فما حاجة قالها سي الباجي قايد السبسي لعباد كاينها ما تعرفهاش. موش كل شي يتحكى و يتقال. مرة جاية كي سي الباجي يحب يشري باكو حلوة لازم يطلع في التلفزة و يقول راهو مغروم بالحلوة !!! وفوا العشرة ملاين سياسي وتوا ولوا 10 ملاين رئيس.    

  • العفسة الرابعة : موش معقول نعت هيكل كيما وزارة الداخلية يسهر على حماية الموطنين، بوزارة الإرهاب. إلي صار هل لايمات من طرف بعض أعوان الأمن موش مقبول بالحق. صارت برشة أخطاء خاطر جاية من سوء تنظيم. لكن موش معقول نربطوا هذا بحقوق الإنسان. الثقة إلي انعدمت بين المواطنين...قاعدة تخدم فيها أطراف تكره تونس تحب تذكر لعباد في بوليس زين المقموعين. علاش ما نخذوش لومور بهدوء ؟





يا ولادي موش معقول نعملوا تفرقة بين الأجهزة...ياخي تحبوا تزيدوا تشعلوها !!! 

سي الباجي قال في الحوار إلي أعوان الأمن ماعاتش يحبوا يتحملوا مسؤولية غيرهم وعندهم الحق. خاطرهم هوما في فم المدفع و أي حاجة تصير في ريوسهوم. الأمن حتى التوا ماهوش منظم وداخل بعضو وصارت برشة أغلاط خاطر موصلناش لتركيح الجو في البلاد. الانفلات مفتعل وكل ماتصير مصالحة بين المواطنين والشرطة...تعاود تتحرب.إلي قاعد يعمل في هذا محضرلنا حاجة خايبة للبلاد وربي يستر...







 في الحالة هاذي حتى ألمانيا تولي دولة بوليس وتنتهك في حقوق الإنسان...

أنا خترت أربعة نقاط حكيت عليهم حاولت نحللهم وحدة وحدة بمنظور سياسي موش بالعاطفة. الشايب إلي قاعد يحكي توا تعدات عليه ألف حكاية قبل و قادر باش يحلل لومور بكل رزانة ومن غير تهييج. عيب على كل من يحاول يهيج ويشحن في الأجواء. يا ناس تعلموا قبل ماتسمعوا حاجة تحللوها و تقراوها من غير أفكار مسبقة. أنا هاني عطيت رايي وكيما احترمت برشة لازم رايي زادة يحترم. ولربما نرجع في بوست اخر نزيد نتعمق أكثر في الحوار متع سي الباجي قايد السبسي.

يتبع أما موش في سير...

نجم نكون صحيح ماكانش راهم غلطوني...                                                                              

baba 3zizi 2.0

الأحد، 8 ماي، 2011

بابا عزيزي والكورة يعن بو...

جيمي تجامب...عنا منو بالهم

رجعت "الكورة يعن بو" و يا ريتها مارجعت. قلنا باش ترجع خلي تنسي شوية لعباد في الهم و تتلهى شوية بسبور، صبحنا نسيقوا في دمايات، نصفيوا في حساباتنا و تخلطت جماعة "الكورة يعن بو" بجماعة السياسة...

شنية الحل ؟ نحيوا الكورة يعن بو جملة و لا نعملوا بوليس أكثر من الجمهور ؟ اش عملنا ؟

مانيش باش نلوم المسؤولين خاطرهم عملوا إلي عليهم كيف كيف أعوان الأمن إلي يخدموا بضمير (موش الكل)، يعطيهم ألف صحة وهاذاك المقدور عليه. الحل نخليو "الكورة يعن بو" على جنب مش وقتو توا حتى نصفيوا أمورنا و نركزوا رواحنا نكملوا الإنتخابات و تولي عنا سلطة تعطي حق لعباد و تخوف الخارجين على القانون...و مبعد يولي فاسيل باش نرجعوا "الكورة يعن بو" و علاش لا متوليش متحضرة سيرتو بعد ما هربوا السراق.

هانا جربنا و طلعت لحكاية قرعة...ماعلينا كان نفيقوا على رواحنا و ما نعطيوش الفرصة للمخربين و جماعة الحرابش...باش يزيدوا يعبثوا ببلادنا.

بان بالكاشف، موش بالمكشوف متع باعث القناة، إلي برشة توانسة...أما خاطيهم الجنسية التونسية...ما يحبوش تونس وماعلينا كان نسكروا عليهم اللعب...

تلموا يا توانسة و أنساوا الجهويات، نعرف إلي شعبنا يحب الكورة و سي نورمال مادام تونسنا خلقت "طارق ذياب ، تميم ، عقربي، عقيد، بالها...". هاذاك علاش لازم نحاولوا ناخذوا عهد على رواحنا ما ترجع "الكورة يعن بو" كان كي ينظاف الجو كمبلتمون. و على أساس صحيح إلي فيه تولي كلمة كرة تتخلص مل الكلمة الاخرى "يعن بو ". علاش لا زادة ما تقدمش ؟ يزي بربي مل خيبات راهو بابا عزيزكم 2.0 جو نيمار و فد مل خور...ماعاتش يحب يشوف إلي صار في باجة، بنزرت وماتش النادي الإفريقي متع رادس...






 أحسن مثال على تخليط شعب "الكورة يعن بو"  بشعب السياسة 


نجم نكون صحيح ماكانش راهم غلطوني...  

baba 3zizi 2.0                                             

الخميس، 5 ماي، 2011

بابا عزيزي و سي فرحات الراجحي ...


...مانيش عارف ياخي تقصد في الميليشيات ولا

باش نبدا المداخلة متاعي أول حاجة بتعريف ضريف لكلمة بوز بوليتيك أو الضجة السياسية : في أغلب الحالات تستعمل هذه التقنية لتلميع صورة أو للترفيع من شعبية رجل سياسة و أحسن مثال لهذا هو محاولة سي محمد الغنوشي تلميع صورتو عن طريق الصحافة...والنتيجة هو ديقاج و الشخص إلي تلهالو بكل هذا تضر في مصداقيتو و مل أحسن منذكرش اسمو...

بعد التعريف البسيط للبوز بوليتيك، باش نحكي على سي فرحات الراجحي و الفيديو إلي كيما سماوها البعض قنبلة. باش نحاول المكسيموم بش منطولش، من ناحية أخرى برشة عباد بش تتصدم ملي باش نقولو...أما مع كل احتراماتي للجميع بابا عزيزي 2.0 مايشوفش لومور كيما لعباد الكل. كي العادة تبعوني مليح عيش وليداتي :

  • العفسة لولا : برشة توانسة تبلانجات في الحجر بعد الفيديو. من غير ما ثبتوا لا في الفيديو هي بيدها. لا الكلام إلي تقال فيها و لا لعباد إلي شاركو فيها "مباشرين وغير مباشرين ". ما زاد هلكنا في هل البلاد كان تصديقنا لكل شي !!
فما حاجات فرعسوني و برشة اسئلة خالاتني نشكك في الفيديو. أول حاجة وقتها، علاش توا بذات ؟ قرار اقالة سي فرحات عندو برشة علاش توا بركة حير لحكاية ؟ ثاني حاجة شنوا معناها سي فرحات يقول للصحافي ما تكتبش و من شيرة أخرى مخليه يصورو...

أباي !! شنية لحكاية ياخي ؟ ياخي شبيك بدلت الديسكور متاعك ؟ يا سي فرحات راك جبتها صحري بحري وحتى كلامك و لا متع قهاوي. إتهام لعباد منغير حتى دليل و سيرتو في وقت كيما هكا يخليني نشكك في الفيديو. ربي يفضلي سمعي و عويناتي إلي عاونوني بش منتأثرش فيسع بالحكايات هاذم ...






 حيرني الفيديو ياسر غامض...سي فرحات فيه ضهرلي ماهوش موضوعي في كلامو  

  • العفسة الثانية : بش نختزلها في أربعة جمل : قلت في الفيديو الثانية إلي الحكومة غير شرعية !! بما انك قاضي، نحب نفهم علاش مالة قبلت بش تخدم في زوز حكومات متع سي محمد الغنوشي وسي الباجي قايد السبسي. زعمة هاذي موش إزدواجية في الخطاب...فكرتني بالشيخ راشد الغنوشي إلي يلعب على حبلين...








الإزدواجية الفرحاتية...  
  • العفسة الثالثة : يضهرلي حمدي بن صالح إلي عمل الانترفيو نسا إلي هو قرا صحافة. نسا زادة إلي لزامو حتى و كان يخدم فريلانس "حر"، باش يلتزم بالحياد و ما يعطيش رايو فلي قالوا سي فرحات هذا بريمو. سوغندو، كلام سي فرحات ماهوش قران منزل بسيف على العباد الكل تصدقوا. تذكير بسيط إلي إنت خالفت زوز حاجات في مهمة الصحافة ولي هوما : التثبت من المصدر تثبت دقيق و ضيعت الهدف متاعك كي عطيت رايك و نسيت إلي موش الناس الكل يخمو كيفك...أنا شخصياً نفهم في السياسة هاذاكا علاش نشكك فلي تقال الكل...معلومة أخيرة ليك لازمك تعرفها ماكش إنت إلي تقول "ce qu'on doit faire" خاطر كاينو ما تعرش العلاقة بن شنية يلزمنا نعملو و الشك...فركس عليها في كتاب فلسفة هذي.

 لم تقنع أيها الصحافي لأنك لم تلتزم بالحياد

باش نختم، أنا متأكد إلي كلامي باش يشوكي لعباد برشة. باش يقولوا بابا عزيزي 2.0 خرف، أما أنا نقلكم حاجة وحدة حضروا رواحكم للزعماء الجدد. فما برشة حاجات بش تتغير وأكيد الموضوع هذا بش نرجعلو مرة أخرى...بابا عزيزي مازالت البركة. لحكاية لازمها أكثر حلقات.

يتبع...

نجم نكون صحيح ماكانش راهم غلطوني ..
.
                                                 
 baba 3zizi 2.0      

الأربعاء، 4 ماي، 2011

بابا عزيزي و الشيخ راشد الغنوشي...

الشيخ راشد الغنوشي...وقيت باش توضح برنامج حركة النهضة الصحيح


مانيش لهنا بش ناتاكيك و لا بش نبر عليك و انتي تعرف الشي هذا. تعرف زادة إلي أنا وياك الزوز من أرشيف واحد الفرق بيناتنا ماناش فرد حكة...كيما قال سي الباجي قايد السبسي .

بالأمس الغير البعيد، قلت إلي أسامة بن لادن مجاهد ضد الطغيان ولي هو مثال لازم لعباد الكل تاخو ثنييتو. خاطروا يضهرلك انتي لوجيك في معالجتو للعلاقة مع أمريكا. عييت و إنت تشكر فيه السيد هذا و تهللو على خاطر كل مرة يعمل البوز BUZZ بتفجير و لا ثنين.

أباي !! تشكر فيه على حاجة معملهاش من أصلو !!  إنتي تعرف إلي هي تمثيلية من عند عمك صام و تعشى على بن لادن ولي السيد هذا في أغلب الحالات فزاعة ماعندهاش وجود...اش خلاهم دفنوه مع الحوت...

براف مش هذا موضوعنا، أنا إلي نحب نحكي فيه اليوم حاجة أخطر برشة. كالعادة باش نستعرضهم عيش و ليداتي وتبعوا عزيزكم 2.0 مليح مليح :

  • العفسة لولا : لاحظت عليك يا شيخ راشد حاجة ياسر خطيرة اسمها إزدواجية الخطاب. وليداتي منشيش تسخايلوني نحكي على إزدواجية كابتن ماجد و بسام... لا غالطين .الازدواجية هذي يعرفها أربعة من ناس : بابا عزيزكم 2.0 ، زين المزدوجين ، سي الباجي قايد السبسي وشيخنا راشد.

بربي سؤال سي راشد : شبيني كي حطيت الجزيرة المرة إلي فاتت نرقاك رجعت في كلامك على بن لادن ومن غير ما تشعر وصفتو بالإرهابي وردتيتو هو المسؤول الأول على مشاكل العالم...هذا بريمو. سوغوندو، إشنية تقصد كي قلت ميليشيات الحزب الحاكم هي إلي قاعدة وحدها تثير في الفوضى. معايا زوز فيديوات، فيهم بش نثبت نظرية الازدواجية الغنوشية في الخطاب السياسي، أون بليس متحبش تتعترف إلي فما في تونس معارضين ليك وكل حاجة تلصقها في التجمعيين المنحطين حاشى إلي ما يستاهلش :



تذكير : الفيديو هذا ماخذو من باج لا تمثلني




 رد بالك طيح في الغلطة... موش شعب تونس الكلو من التجمع...فما زادة شكون ما يحبوكش  


  • العفسة الثانية : في نفس السياق زلعتها ياسر بالكلام قبل و بعد الثورة. نعرف إلي فما حملة كبيرة عليك و على حركة النهضة عموماً و أنا ضد  هذا. لكن كان ترجع شوية للتصريحات متاعك تو ترقى روحك ديجا ستفزيت لعباد و خليتهم يحقدوا عليك. أعمل فلاش باك صغير واتو ترى :






اه هاذي ما نسامحكش عليها جملة خاطرك سابيتلي ولدي و ولد ولدي إلي كان موش هوما راك ماكش في تونس تتكلم .... 


في النهاية ،مجرد نصيحة ليك يا شيخ راشد من عند راجل كبير من فرد أرشيف أما من حكة أخرى : وضح الخطاب السياسي لناس، أحكي معاهم، اقنعهم مافيها باس كان تعمل حوار مع إلي تسميهم العلمانيين... تتناقش معاهم وتوضح وجهة النظر متع الحركة متاعك.





 منشيش تنسى كلمة الديمقراطية إلي غنيتهالنا بعد الثورة...وتولي هكا ؟  

يزي من الاتهامات وأخزر لبعيد شعب تونس مايحب يقصي حد، خاصةً لعباد إلي اضطهدهم زين المضطهدين. حاول إستغل الفرصة التاريخية مكانش راك باش تهرم و الهجمات إلي قاعدة تتنظم ضدكم ماهاش باش تاقف. أنا راني معارض كلياً الحملة إلي ضد حركة النهضة وحسب رايي، ماينجم يوقفها كان إنتي. أنا هاني نصحتك و انتي دليلك ملك...

نجم نكون صحيح ماكانش راهم غلطوني ...                            


baba 3zizi 2.0

الاثنين، 2 ماي، 2011

بابا عزيزي و بن لادن ...

بن لادن ...ألباتشينو العرب

مانصدقش أي نعم ما نصدقش. ماكم عملتوها قبل و طلعت تفليمة. ياخي قداش من مرة بش نقعد نحرق في أعصابي ونقنع في روحي إلي

لامريكان صادقين ويحبوا لينا و للشعوب متع العالم الخير. تي شنية ها الطلعة الجديدة متع قتلان بن لادن، ياخي صغير نرضع في صبعي... راجل عمرو 85 سنه بش تتعدى عليه حكاية كيما هكا. فما زوز سيناريوات مفماش غيرهم، الأمريكان يحبوا يغموا بيهم العالم وهاو بش نستعرضهم لثنين وتبعوني عيش ولداتي بالقدا :

  • العفسة لولا : إلي لمريكان وبعد إلي صار من الثورات في تونس و باقي البلدان...تحب تنسي لعباد شوية، خاطر لحكاية ماعاتش تساعدهم. شنية ولاة كل درجين ثورة، يزي عيب عمك صام ولد رمضان مايحبش و مايساعدوش كل مرة يطييح راس من ريوس القفافة كيما "زين المندسين" وغيروا ....  
 
عاد سيادتو العم صام "و تعشى على كذبة"، يحب ينسينا الفشل الذريع في التعامل مع الموقف في ليبيا ولي فيه ورى إلي هو يخاف برسمي من المهبول القذافي. دوويوا... عزيزك 2.0  فايقلك وما يموت إلا مايكمل تنبيرو عليك.      

  • العفسة الثانية : إلي لمريكان كملوا خدمتهم بألباتشينو متاعهم OBL "العميل السري متاعهم" والمسلسل متاعو وصل للحلقة الأخيرة ووقيت البطل يموت غير مأسوف عليه. هذي طبيعة العم صام يخدم بيك ويلوحك في البحر و ماعليك كان تولي حوتة...أنا شخصياً ما نستبعدش إلي بن لادن شخصية مفبركة ،وفي اخر حلقة يجي رؤوف كوكة يضحكلنا ويقلنا شاركتوا معانا في الكاميرا كاشي...      




 تعلم الفوتوشوب مع عمك صام وتعشى على بن لادن

باش نلخص، أنا يا أخي المواطن نخاطبك بلوغتك ونقلك راك مهبول كان تصدق الأمريكان. تعلم يا أخي العربي إلي لازمك تكذب أي حاجة تجي من عند عمك صام وتعشى على بن لادن حتى قبل ما تحللها..هكاكة تنجم تربح صحتك...

 في الختام عندي ليكم خبر سخون وانتوما احكموا شكون يكذب خير،  بابا عزيزي 2.0 ولا عمك صام و تعشى على  بن لادن :       





عاجل : بن لادن حي يرزق و يرفض دفنه في البحر من دون علمه وذلك لإرتباطه بموعد مع شاك نوريس وستيفن سيغال...


نجم نكون صحيح ماكانش راهم غلطوني ... 

baba 3zizi 2.0 

الأحد، 1 ماي، 2011

بابا عزيزي و الشهيد فرحات حشاد...

المناضل الوحيد إلي مخدمش مخو على تونس : فرحات حشاد

توة قرابة 59 سنه تعداو على إستشهاد المناضل فرحات حشاد، أول مرة نحس إلي السيد هذا خذا كارو. أحسن كادو ينجم العبد يحتفل بيه بعيد الشغل إلي كنا قبل نخموا فيه كان عل فيشتا : هو شريط وثائقي على فرحات حشاد. البارح 30 آفريل 2011 في صالة لافريكا تونس، عملوا بروجكسيون شريط متع الشهيد. شخصياً بما اني حضرت متتصوروش قداش فرحان وخاصةً كي ريت عايلة الشهيد الكلها جات السيدة أم الخير، ولدو نور ألدين وبنتو.. 

ديقاج يا بيوع... الشهيد موش محتاج لتنوفيقك   

بعد البروجكسيون، قعت حال فمي باهت !! إسئلوني علاش نجاوبكم ؟ 

وليداتي إلي ريتو شي من العجب...نكتة كحلة قعدت في قلبي... التدخلات متع الحاضرين حاجة تضحك وشطرها خارج الموضوع، النقاشات بيزنطية ولاة... و تحل كوري في الصالة على غير مفما شي. صحيح هو الشريط مهوش حاجة خارقة للعادة من ناحية التصوير و تسلسل الأفكار أما الفيلم الوحيد إلي تجرأ بش يحكي على دوسيات مسكرة من عام 1952...الفيلم هذا هبط عام 2009 معناها في عهد زين الخيانة...و نتوما إفهموا وحدكم ... 
 
عزيزك 2.0 فايق  وشمها قارصة بعد  المداخلة متع نور الدين حشاد (ولد المناضل) ولي فيها كشف المستور على تفاصيل الاغتيال والمتواطئين فيها، اليد الحمرة و سقوتياتها... و سيرتو نقطة الاستفهام على علاقة فرحات حشاد بالحبيب بورقيبة إلي بش نحكي نهار لازم عليه في أرتيكل وحدو...

كمشة عباد قاعدين من تالي مفهمتش اش بيهم قاموا يعيطوا "توة تأكدنا إلي الشهيد مات " و دخلوا بعظهم كي دار الفرح...أباي !!! فاش قام   ؟

الناس هاذوما معجبهمش كلام ولد فرحات حشاد تقول هوما يحبوه أكثر منو ولا من عايلتو، انا نسميها قلة تربية هاذي على خاطر في سبرنا والدينا ماعلموناش نقصوا علي يتكلم ولي أغرب لا واحد فيهم إحترم عل قليلة عايلة الشهيد...

ملة خور وملا تسيب ولا في بلادنا !!!! أقوى لقطة شفتها في الخوذة هاذي، قناة حنبعل تيفي...دوم ما لحمت بالحس ترموا يصوروا...اه منك يا باعث القناة !!!     

عندي كيلمة في الاخر نحب نقولها لناس هاذم جماعة التفليم والأصوات العالية، إلي عندو وثيقة  تثبت أي حاجة في موضوع فرحات حشاد معليه كان يتقدم بها، كان معندكمش بربي اسكتوا ونقصولنا مل الحس. ولي كان مخبي وتوة وين طلع راسو معليه كان يعاود يخبيه على خاطر الصلوحية متاعو وفات ...ولي متعلمش في المدرسة اداب الحوار معليه كان يرجع لل مكتب ويهز لمجة معاه... 

سامحوني عل كاليتي...راني نسيت المصورة : هذي السيدة أم الخير لحظة تكريمها

الحاجة الباهية ولي فرحتني بعد ماخرجوا جماعة الحس... قعدوا برشة ناس منهم العبد و لللله، الراجل الكبير إلي غنى كيما لعباد الكل النشيد الوطني و صفق كي كرموا السيدة الفاضلة أم الخير مرت الشهيد...الله يرحمو وينعمو .

نجم نكون صحيح ماكانش راهم غلطوني ... 

baba 3zizi 2.0