موتور تنسنيس

الاثنين، 18 جويلية، 2011

خطاب السبسي فرعسني و هاو علاش...

لا اليوم...بلبزتها يا سبسي 


مانيش فرحان و فادد و نحب نتكيف ماري خوانا...إي نعم راجل كبير و نعملها. علي ريتو توا في خطاب سي الباجي قايد السبسي. خور بأتم معنى الكلمة !!

عندي سؤال خطير جداً : ياخي سي الباجي خطب قبيلة ولا زاد خبطها في بعضها ؟

اليوم سي الباجي عمل غلطة كبيرة ياسر كي تكلم..علاش ؟ خاطر مافسر شي و ما قال شي. ملزوم المرة هاذي مانطولش ونفسر علاش غلط في عفستين كاهو، ني بليس ني موان :

  • العفسة لولا : ياخي ماو كي تاعب ماتحكيش...لازامك تكون فايق يا سي الباجي الدنيا راهي شاعلة و ماهاش ناقصة دوخة. موش معقول خطاب كيما إلي ريتو اليوم... عدو باش يكفرني. مافهمت شي و معادش ناوي باش نفهم شي...سايي سي فوتو (foutu) !! يزينا  يا اخي من الدوخة المصطنعة راهو موش وقتو جملة !!
  • العفسة الثانية : غلطة كبيرة عملتها يا سي الباجي قايد السبسي ...على خاطر موش وقت تهديد توا بالعكس وقت تهدية. في بالك إلي الليلة تنجم تشعل للمرة الثالثة على التوالي. كيفاش تحبها تريض و انتي عطيتنا ديسكور فاشل بكل المقايس. ياخي ماو كي تحس روحك ماكش في صحنك ماتخرج تحكي. دين الام اليلة ضاهرة باش تخمج...ناقصين مانا !!  

ياخي بربي شبي الدنيا تبلبزت ؟ توا من شيرة الحكومة خايفة من شعب و الشعب خايف من الحكومة... تعرش كيفاش عندي نصيحة لزوز :

  • الحكومة : حطها في بالك راهو خدمة من غير ضغط من الشعب ماهاش خدمة...بسيف عليك تحترمو و تقدرو وتفسرلو بالسياسة
  • الشعب : حط في بالك يا شعب إلي زادة راهو توا موش وقت خرم إسقاط النظام. عندك إنتخابات تستنى فيك و لازمك تكمل بلي عندك و حد مايمنعك تعبر على رايك أما من غير تبلبيز يعيشك.


تدوينة اليوم حبيتها قصيرة باش ماتوليش تبلبيزة وكلام زايد...خاطرني فادد فادد فادد فادد !!!

نجم نكون صحيح ما كانش راهم غلطوني و لا كربسوني على راسي...          

baba 3zizi 2.0