قريباً مشروع المجتمع المدني بتونس ...

Soon ... www.lesassises.org

بلادي مرتع لصراع الداخلي و الخارجي

يضيق صدري ولا ينطلق لساني. يبدو لي أن تونس أصبحت حقل تجارب للداخل و الخارج منذ قيام هاته الثورة المشبوهة. لتتحول بذلك بلادي إلى مشروع نموذج عراقي لكن في صيغة حديثة.

شي من أمريكا، شي من فرنسا، شي من قطر ، شي من السعودية و ربما شي من إسرائيل أو إيران .. و لما لا شي من إريتريا أو مالاوي. مع هذا يبقى موقف الحكومة سلبيا داخلياً و خارجياً.

*خارجياً : الحكومة ... هي لا تحرك ساكنا أما المستعمرين الكلاسكيين فرنسا ، العثمانيين و الغرب، و في حين اخر تفتح فمها للريح أما المستعمرين الجدد من قطر و السعودية. شريط الأحداث بدأ منذ 14 جانفي 2011 ، عندما أحست فرنسا أن الأحداث قد تجاوزتها و أن أمريكا هي من دبر كل شي لينطلق الصراع على من يظفر بمباركة الثورة و شهدائها أولاً. لتخلى الساحة بعدها للعثمانيين لعرض خدماتهم على شعب يعاني إلى الأن من تبعات إحتلال عثماني سابق. جرد الدول العربية من أبسط الأشياء حقها في تجاوز التخلف. لينطلق بعد هذا الصراع الخفي بين قطر و السعودية من أجل خطف دور الزعامة العربية و إستغلال الضعف المصري الحاصل نتيجة الثورة. فأصبحنا بذلك نشاهد مساومة و إبتزاز فالدولتان ترعيان إثنين من المطلوبين للعدالة وهما بن علي و صخر الماطري. يغريقاننا بقروض وهمية لبسط سلطانهما علينا. و من يعلم من كذلك يسعى لدخول البلاد و بسط سلطانه أيضاً علينا ...

*داخلياً : الصراع أصبح دينياً بحت ليتحول بعد هذا إلى صراع طائفياً. و كأن تونس عادت إلى العصور الردة و الواجب الأن إعادة الفتوحات لتنظيف العقول المريضة "المشعارة". أحداث متاتالية من الغزوات للمطار للمنڨالة و لقصر العبدلية وصولاً إلى إعتداء على الشيخ مورو و استفزاز لطفي العبدلي و ختامها مسك ما حدث في بنزرت مع عميد الأسرى الفلسطينين سمير القنطار.

موقف الحكومة الانبطاحي تجاه مثل هاته التدخلات الرعوانية للسلفيين ليس له إلا تفسير واحد أنها هي من تحركهم. و عن عدم التدخل ضدهم لأنهم ينتمون إلى النسيج التونسي هي تعلة واهية.

مع كل هاته الأحداث قد يحن المواطن العادي إلى زمن بن علي و أنا شخصياً لا ألومه في ذلك فعلى الأقل في عهده لم يرى جرذان تبحث عن جبن أو قمامة في تونس ...

ارفعوا أيديكم عن تونس فصراعاتكم لا تهمنا يا أيها البرابرة ...

القائمة الحصرية للي باش يعزڨوه رمضان 2012

مفتي الجمهورية : مع الأسف تعذر علينا رؤية الهلال ما فماش رمضان هذه ألسنة 

كيما جرات العادة، كل رمضان نقدم قائمة حصرية للأشخاص المعصومين من صيام رمضان و هذا لتوفر بعض شروط الإفطار عندهم. قائمة هذا العام مدهونة بنفحات نهضاوية إلي فازت بالإنتخابات و يحتمل أن تفوز بالإنتخابات الجاية مادام المعارضة مازلت تشرب في ماء البحر ...

لا مقدمة لا مازمبي ... القائمة تضم كل من :

هالة الذوادي : أول المفطرين، صاحبة مقولة انت توقف ؟ سبب الإفطار قول الفاحشة و إستعمال لغة الخانات، صحة شريبتك يا موظفة باعث القناة 

رفيق عبد السلام بوشلاكة : أفطر هذا الشهر لأنو بعد يوم عصيب من العمل المتواصل عمل غمضة كلفتو احتلام مما يعني وجوب الاغتسال، صحة شريبتك يا مشلك الخارجية

لو حمادي جبالي : أفطر هذا الشهر بعد نعته لرأس المال بالجبان أي إرتكاب خاطيئة التنابز بالألقاب، صحة شريبتك يا قاهر اللغات الحية 

أم البوعزيزي : أفطرت لتلفظها بعبارات نابية لأحد الأعوان وتهجمها عليه و بذلك تصبح فصالة على شاكلة علي شوورب، صحة شريبتك يا مهد الثورة  

مصطفى بن جعفر : أفطر لإرتكابه التلحيس و الإنبطاح و الطحين الوجوبي لحركة النهضة، صحة شريبتك يا لحاس 

أحد روائع الفوتوشوب : مفطر ثم مفطر لارتكابه خطيئة إنتهاك حرمة الفوتوشوب .... يحرم والله جلدو  

مع هذا ترى من يحافظ على صيامه كاملاً :

الشيخ و الشيخة 

نجم نكون صحيح ماكانش راهم غلطوني ولى راني عزڨتو رمضان السنا تحت الحيط...

من يمتلك رأس المال الجبان في تونس ؟

رأس المال الجبان

من نودار الحكومة و رئيسها المفدى السيد "لو" حمادي الجبالي، إختراع مفهوم جديد لرأس المال و إن هي ليست النادرة الوحيدة للحكومة ... فإن عمق هذا المفهوم الجديد يجعلنا نتوقف للقيام بنظرة تأمل.


رأس المال الجبان ... أحلى ما جادت به قريحة السيد الوزير الأول لتنظاف إلى الجباليات المتعددة و المتكررة. يقول رئيس الحكومة إلي راس المال الجبان ما هوش إختصاص الحكومة الشرعية ولي مثل هذا المال هو حكر على الجميع إلا الحكومة المقدسة. و لو أن القصد مفهوم "كمال لطيف" و إلي حتى لتوه شخصياً ما نعرش السيد هذا واقع أم خيال علمي. إلي يحب يصفي حسابو مع عبد يجبد اللطيف ... كيما قالي عطار الحومة : "كمال اللطيف حشهالي في دبابز الڨاز ... يلعن رأس المال الجبان".


فبحيث وين يتجبد كمال اللطيف يتجبد النظام السابق أو بن علي. الغريبة في الجبالي أنو ما يعرش إلي رأس مال النظام السابق "فاسد" و لا يمكن وصفه بالجبان ... لأنو سرقة عيني عينك و على مرأى الجميع أو على الأقل سرقة بإستحقاق ...


أما.............................................................................................

بالنسبة للرأس المال الحالي، النهضاوي، القطري/السعودي التمويل و بأمر الولايات المتحدة الأمريكية، أليس هذا هو رأس المال الجبان ؟ إستغلال الثورة و شهدائها، أليس هذا هو رأس المال الجبان ؟ تدمير الإقتصاد و تحويله نحو التبعية، أليس هذا هو رأس المال الجبان ؟ مليارات البغدادي المحمودي و براميل نفطه، أليس هذا هو رأس المال الجبان ؟

فبحيث كان حكينا على رأس المال الجبان في تونس .... أعرفو راهو نهضاوي .... ولا مجال للحديث الأكثر.

عربانستان بعيون تركية

عربانستان النموذج الأمثل حسب الأتراك 

رغم الكبوات المتعددة التي لا تحصى و لا تعد : من مرزوقيات منعدمة الصلاحيات ... جباليات مونفخات ... جعفريات صباح و ليل ... غنوشيات مسيطرات وفي بعض الحالات تشليكات خارجيات ... مع كل هذا فإن الحكومة تجد الوقت لبرمجة تدريس اللغة العثمانية (التركية) في مدارسنا العام الجاي. في حين تتناسى الحكومة الشرعية و المؤبدة إلي فتياننا و فتاياتنا لا يفقهون شيئا من لغتهم الام

العربية ... بحيث ما يعرفوش معنى كلمة "المرأة القحباء " و التي تعني بالفلاقي : المرا إلي تشدها الكحة برشة و ليست فتاة الميدان. 

و يقولي لغة تركية ... يلعنها اللغة العثمانية ...

يبدولي الأتراك حنوا للزمن الجميل ... زمن الاحتلال، زمن تفقير الشعوب العربية وتبهيمها، زمن التأمر على ثقافة العرب ......... زمن الدولة العثمانية و الوصاية على مقدسات العرب وثقافتهم. و حكومتنا ويني ؟ تاكل في الضلف التركي و تعدي بالفلوس العثمانية...  

و يقولي لغة تركية ... يلعنها اللغة العثمانية ...

نشكرك يا حكومتنا الشرعية والمؤبدة على هذه البادرة الطيبة بفضل الحنكة المعتادة متاعك .... تركيا عملت كيف على نموذج عربانستان إلي موجود في تونس و بذلك مستعدة لتوقيع معاهدة الحماية 2012 ... و التي تنص تسليم تونس ثقافياً للدولة العثمانية ...

تذكير : التاريخ لا يرحم ... الاحتلال العثماني للعرب خلف ما يعبر عنه توه بالبدع و الفتاوي المڨحولة في الدين الإسلامي عبر التاريخ.

نجم نكون صحيح ما كانش راني ... عثماني ...

البغدادي المحمودي و لعبة النهضة القذرة

البغدادي المحمودي 

ياخي ما كامش حقوقيين ؟ ياخي ماكمش مخلصين إشتراكات في منظمة العفو الدولية ؟ ياخي موش عذبكم بن علي و خززتوا في حبوساتو ؟ فهموني علاش قرار تسليم البغدادي المحمودي تفعل في هذا الوقت ؟

قرار رفضت الحكومة السابقة تفعيلو أو بالأحرى (مهطلت فيه ) اخواننا الجرذان لما قد يأدي ذلك إلى ما لا يحمد عقباه كخسارة الشرعية الدولية ( بلاد ثورة و حريات و هات ماك ألاوي ) و بذلك في صورة حدوث مكروه للبغدادي المحمودي ... حضروا رواحكم يا حكومة ( كرارزكم لازم تكون نحاس ) لما قد تاكلوه من بخس من المجتمع الدولي و قتها لا تنفع لا قطر و لا وجدي غنيم ... ولى قلي الخارجية متع تونس حقا ولات روضة لا تفعل و مفعول بها إلى جانب رئيس خالي حتى من حق دخول التوالات من غير ما يشاور.

يقال أن هذا القرار جاء بعد زيارة الوزير الأول الجرذاني ... عبد الرحيم الكيب و إلي فيها وهب تونس ( بلاد مازمبي ) من كاسة المال القذر، 200 مليون دولار. هههعععهه يضهرلي إلي حكومتنا ما تعرش إلي مثل هذا الرقم لا يمثل شيء في ميزانية دول ... حق زوز طيارات مذرحين من عند بوينغ و ربما حق بلعة لاقامة إحتفال على شرف ها زوز طيارات. 

صحيح أنا كنت نمن إلي حكومة العهد الحالي ( حكومة الترونكا ) غبية و ما تفعلش أما بش توصل إلى هذا المستوى من الإنحطاط و قلة الخبرة ... فعلى الدنيا السلام ...

على فكرة ... مثل هذه الحكومة كي طلبت بن علي من اشقائنا الوهابيين في السعودية الشقيقة حاشى المحل ... قلولها أهااااووووووووووووووووووووووووووووووووووووووووووووووووووووووووووووووى ... قرض ببعض الملاليم و أخطاك من الحكاية. فوافقت الحكومة وعادت إلى المنزل فرحةً مسرورة.

ملاحظة : وصف جرذان لا ينطبق على المواطن الليبي الشريف و انما على من يسمون أنفسهم بالثوار ... 

نجم نكون صحيح ما كانش راهم سلموني للجرذان ...

الأدمين لن يكون مدوناً أحب من أحب وكره من كره

غريب أمر الأدمين تسمع جعجعة و لا ترى طحين. لقبوهم (في صيغة الجمع ) بالمدونين و ماهم إلا بمزويرين، سموهم بالمحررين و ماهم إلا بسجانين، وصفوهم بالمناضلين و ماهم إلا بمنافقين، قالوا لهم "راكم مدونين" قلنا لهم " يبطى فنحن هم المدونون". 

مرحباً بك سيدي القارئ فأنت الأن ستكتشف التعريف الحقيقي لكلمة مدون من دون إطالة و لا ألاعيب. 

المدون هو شخص يعشق الخربشة المتواصلة على دفتر ملاحظاته الافتراضي ... يعشق كل حرف ينقره على لوحة مفاتيحه ... يكتب و لا يمل ما دام الظلم يسلط على رقبة الوطن ... يحارب و إن كان متخفياً لإحلال العدل في مجتمع انهكه الفساد. هو ذكي ،طريف، و جلاد للغطرسة و الإستبداد. هو ببساطة مدون يملك أبسط الأشياء، مدونة مجانية على بلوغر أو وورد براس و ليس صفحة فاسبوكية. 

و الأن هل يعقل يا عزيزي القارئ بعد كل ماذكرته أن تسألني عن تعريف الأدمين ؟ 

مع هذا فإني سأقول لك أن كل ما ذكر في تعريف المدون هو العكس بالنسبة للأدمين مع إضافة وصف موزع ألي للإشعات و الترهات الفايسبوكية. 

أحسنت عزيزي القارئ، أنت الأن تعرف الفرق الحقيقي بين التدوين و"التمخوير" و أنت الأن تدرك أشد الإدراك، الحقيقة التي لا يريدك الأدمين أن لا تعرفها فبادر بالحذر من ألاعيبه. 

أما أنت يا أدمين، أعرف أنك قد تهاجمني و حتى تشتمني إلى حد تهديدي و مع هذا لن أترك التدوين لأصبح أدمين ... لأني أكره ضلالك المبين ... 

خلاصة، أنت ستبقى فقط أدمين أحب من أحب و كره من كره...

المواطن التونسي إلى أي حزب ينتمي ؟

الشيخ المنصف الورغي : التونسي خلافي زمقتالي بطبعه 

ثورتنا ثورة تصنيفات، إنت و أنا و هوما. هكة تحكم الثورات الناقصة على الشعوب بالتحسر على الماضي الأليم ( ولى توه ماضي سعيد ) و أو بالتحزب و محاولة القيام بعملية ( نحير إسمي ) من بين جملة السياسين المتمرسين ... منطق متع زمقتال ... خلافي موازي !

بحيث يا أيها المواطن الشهلول لابد لك أن تصنف نفسك ... لا يجيوا يصنفهولك ... و إليك لوصفة السحرية الزمقتالية .... 

كانك إنسان تعشق الكورة، تشوط باليمين و اليسار، ما تكدريش أما البونتوات الكل يتحسبولك خاطرك نغار و تعمل برشة حس ... فأعرف أنك من أنصار حركة النهضة ...

كانك خايب، أصلع و تحب تنبت الشعر بالسيف حتى كان تستعمل الديتيتي الفائدة تظهر أنيق بالشعر الجديد ... فأعرف أنك من أنصار حزب المؤتمر من أجل الجمهورية ...

كانك نمس، كنت خلافي دورتها موازي و استعملت الثوم لغايات مشبوهة و انبطاحية ... فأعرف أنك من أنصار التكتل من أجل العمل و الحريات ...

كانك على باب الله، تفهم ما تفهمش، إلي في قلبك على لسانك بالصحيح ولى بالغالط وتتفرج في المستقلة ... فأعرف أنك من أنصار العريضة الشعبية ...

كانك مناضل أما زلعتها برشة برشة بعد الثورة و من و قتها عاودت حساباتك بش ما عاتش تزلعها مرة أخرى يقولوا عليك كافر ... فأعرف أنك من أنصار الحزب الديمقراطي التقدمي و مستعد للتحول للحزب الجمهوري ...

كانك كانك كورت في الجيش جناح أيسر ... وجاك نهار إنفراد بالحارس إستدعى منك أنك تشوط الكرة باليمين أما سيادتك ترفض قال شنوة يساري ... فأعرف أنك من أنصار حزب التجديد القطبي ...

كانك في صغرة بوك و أمك مسنسينك بلاتاو ... وكي كبرت تحب تنتقم من مجتمع قائلاً له أهوى !! ... فأعرف أنك من أنصار الإتحاد الوطني الحر ... 

كانك في الدار معلق تصاور قدماء الأبطال القوميين الفاشلين ... فأعرف أنك من أنصار الأحزاب القومية التونسية ...

كانك إنسان مكرز فادد من دنيا، من الغلاء، من التهميش، من البطالة، من الجهالة، من النفاق ... فأعرف أنك لم تفقد إنسانيتك وستبقى حاملاً لوصف مواطن ...

نجم نكون صحيح ما كانش راني مواطن ...

المرزوقي مخ و أحنا هوما الزكم

المرزوقيزم ... إختياري و سايي تحشالي فيه 

بعد عملية تحديث فايسبوكية و تويترية متعمقة ... توصلت إلى نتيجة بنت كلب. المرة هاذي باش نكتب بإستعمال عبارات التكريز فكل من يحس روحو يحشم ... يدو ثم يدو .

المرزوقي أو ضاهرة المرزوقيزم ملي تربعت على عرش الخلافة عفواً عرش الخلافة الموازية ... ،فالخلافة الراشدية هربوا بها الصحاح أصحاب رقم 6 ، بحيث ملي قعد مقعد الرئيس لا يكف عن إبراز سخافاته و عربداته وتبلبيزاطه و شطحاته و غبائه خاصةً. يا أخي كي هو منبطح شديد الانبطاح إلى حركة النهضة و مشروع الترويكا الخبيثة اش بيه كان هو موضع سخرية ؟

سؤال محير ياسر يحير بنسبة لية ... ما فماش مواطن واحد منتمي إلى ربوع هذا الوطن العزيز تسائل : شنية أهداف المرزوقي من تسلم الرئاسة بودورو و من دون صلاحيات ؟ فما كومبلو ؟ و هل الكومبلو يشمل حزب المؤتمر من الزنطورية ؟ ولى مشروع المرزوقي مشروع فردي لرجل سياسي محنك ؟ 

أخطانا من منطق الكومبلوات والمؤامرات الماسونية و خلينا في اللوجيك. ما فائدة سلطة منقوصة ما تفعلش ؟ الوصفة ساهلة اخترعها رئيس مؤقت و إلي زاد سهل المأمورية عليه عظيم خبرتو كطبيب لجميع أمراض الإسهال و جريان الجوف و الكراسي.

المرزوقي توجه منذ توليه السلطة إلى الشعب مباشرةً بخطابات رنانة ما حلبوش بيها الطبقة السياسية. مثل هاته الخطابات الرنانة خلقت شهرة سياسية للمرزوقي و إن كان تفريكة ... إلى جانب بروز بعض الظواهر الاجتماعية كتقبيل الرأس ( ولما لا نهار تقبيل راس ...) أو تقبيل الأيدي ( ولما لا تقبيل الأرجل في فرصة قادمة ) ... 

tkakirats.tumblr.com

يعني بعبارات أخرى السيد قاعد يعطي في وجيه حلو للتوانسة ... رئيس كيما يحبوه هوما تفريكة أما في الواقع هو إلي يكركر فيها عليهم. و في إنتظار الضاهرة الجديدة إلي ممكن يأتي بها رئيسنا نأكدلكم من هذا المنبر كان ماخذاهاش الرئاسة مصطفى بن جعفر في الفترة القادمة كان كتب ... فأكيد المرزوقي باقٍ و سرو سيبقى في بير إلى أن يأتي ما يخالف ذلك ...

زيدوا فركوهم عليه ... المرزوقي مخ و أحنا هوما الزكم ... 

نجم نكون صحيح ما كانش راني مرزوقي ...

بورتريه بوشلاكة

التشليك تشليك و لو ذهب إلى الصين 

الاسم واللقب : رفيق عبد السلام بو... شلاكة

شهرة : بوشلاكة بسيف عليه 

تاريخ الولادة : تاريخ تسلمه وزارة الخارجية

مكان الولادة : الدوحة - قطر

الجنسية : قطرية

الطول : فارع

الوزن : منذ توليه للوزارة الخارجية ولى يعلف

لون العينين : سود كي سواد جع....و

الشوارب : ما أخيبو 

الأسلحة : نظارات ثاقبة توري العماء

الهواية : ممارسة الأعراف الخارجية... يعرف العود في صور...و 

العمل : وزير ضعيف لا يعمل

خبرة : لا يقل عن 23 سنة من الطحين المتواصل و العمالة لأصحاب الكشط و الشلايك بوصبع 

المستوى التعليمي : دكتور في علم ... الفلك 

أفضل المقولات : 500 كيلومتر سواحل تونس و إسطمبول عاصمة تركيا

نقاط القوة : عين ثاقبة في علوم الجغرافيا، القدرة على طرد سفير خيالي، الطحين للعراب الأكبر راشد الغنوشي

نقاط الضعف : لا يوجد

الشخصيات القدوة : راشد الغنوشي، حمد بن خليفة أل ثاني، رجب طيب اردوغان، منصف كحلوشة، طرشقانة، علي العريض

الشخصيات العدوة : الباجي قايد السبسي، بشار الأسد، الحبيب بورڨيبة، لبيب للبيئة حبيب 

tkakirats.tumblr.com

كلمة أخيرة :

بوشلاكة... يا بوشلاكة ملي طليت ... بلادي منها فديت
بوشلاكة... يا بوشلاكة ملي هديت ... بلادي منها هجيت
بوشلاكة... يا بوشلاكة كم أنت عجيب ... منك بلادي ولى لازمها طبيب

نجم نكون صحيح ما كانش راني تشلكت ...

يا بوليس من أنتم ؟

الشرطة في خدمة الضرب  

يرحم أياماتك يا بوليس يا سياسي ساقط أما رويجل لا تضرب لا تقمع لا تشمم الڨاز ... تهز من غادي الغادي، أتلف و تخدم تحت حس مس، تركب الخلق في الباشي و ايسيزي و لا حد من شاف ولا من ديري. نظيف بأتم معنى الكلمة.

بوليس توه ما بعد الثورة كاينو شاهي لحمة المواطنين سلميين كانو ولى مضطهدين. في كل محضر يحضر بلغة أخرى يستنى في اللحمة للي تجيه لعلا و عسى يسترجع ذكريات الزمن الجميل مع السابقين أصحاب الباع و الذراع في قمع المعارضين.

بوليس توه عندو كان إسم واحد...بوليس اللفيني...مادد وجهو كان غادي في حين البلطجية و أصحاب الشهائد في السوابق العدلية يمرحون في كامل ربوع الوطن العزيز. و كاينو تونس تبدى حدودها من المونڨالة الماسونية وتنتهي عند البور دو فرانس.

بوليس توه حب يقنعنا بفرد الترهات متع السابقون كفريعة التجمعي و الراجحي العبيط و الصيد الجزار. ترهات من نوع رانا تبدلنا و رانا إلى جانب الموطن الزوالي في حين أن المواطن الزوالي هو أكثر لحمة ن....ت على راسها الضرب.

بوليس توه يخدم تريبل فنكسيون : شرطة مرور مختصة في شارع الحبيب بورقيبة حاملة للماتراك، بوليس ملثم متحصل على دكتوراه في رجم المواطنين بالغاز الطبيعي، و بوليس مليشي متحصل على شهادة من أنتم ؟

بوليس توه تصبغ بلون السيد الوزير علي العريض كيما تصبغ من قبلو بألون أخرى...مع العريض "لتنظيف الداخلية" لا بد من تنظيف البلاد من أي معارضة تستهذف التنظيف...معبوكة كل وزير يشد الداخلية سمعناها قبل... 

مل الإخر يلعن أبو أم البوليس كان باش يقعد حياتو كاملة يكذب علينا...يا مازمبي من أنتم ؟

نجم نكون صحيح ما كانش راني عريض ...

الدين و العلمانية وجهان لعملة واحدة

Source Photo : nawaat.org

تونس دولة حرة مستقلة ذات سيادة، الإسلام دينها و العربية لغتها و الجمهورية نظامها. هذا ما يقوله الفصل الأول من دستور (1959).

دستور طالته الأيادي الخبيثة فحصل ما حصل من مفسدة. لكن هذا لا يعني أن أسسه لم تبنى على بناء صحيح.

ربما اخترت أن أبدأ حديثي إنطلاقا من هذا الفصل الذي كثر الحديث عنه، لأقدم شرحا بسيطا لما جاء به. لربما لم ينتبه الناس لهاته الكلمات المسترسلة ضاهريا و المليئة بالمعاني ضمنيا . لو عدنا إلى مضمون كل من الأحرف على حدا للاكتشفنا أن مثل هذا الفصل قد حقق التوافق بين جميع الأطراف.

رغم أننا لسنا في درس لغة أو نحو، لكن يبدو للبعض أنهم لم ينتبهوا إلى أن حرف الهاء أعيد استعماله بصفة متعمدة للتأكيد على أن الإسلام هو دين تونس وحدها و ليس إلزاميا على الجميع. بعبارة مبسطة، لكل شخص الحق في إختيار عقيدته بكل حرية و بدون مجادلة. فتونس كدولة قد اختارت لنفسها دين الإسلام و مع هذا فهي تضمن الأمان و التسامح مع باقي العقائد مهما كانت.

إذا أين وجه الإختلاف بين الدين و العلمانية ؟ أليس مثل هذا الفصل عبارة عن تكامل بدل الإختلاف ؟

ربما يكمن الاختلاف في طريقة التعامل مع الأمور. لم أكن أعلم سابقاً أن التونسيين، رغم قمع المخلوع، هم من هواة التخالف لمجرد التخالف. تونس بلد صغير و منذ نشأتها ضلت مسرحا لتلاقح الحضارات و مع هذا لم يخرق مبدأ الوسطية. أحزن شديدا عندما أرى إنشقاقا بيننا. كيف أقبل وجود من يسمون أنفسهم اسلاميين في حين انني مسلم فقط و لست إسلاميا ؟ كيف أقبل أن أكون علمانيا متزمتا في حين انني أميل إلى الوسطية ؟

لست بعالم دين متعصب لا أقبل بالأخر كما انني لست بفيلسوف لا يؤمن بمبدأ العقائدية. أنا ألخص نفسي و جميع التونسيين في كلمتين مهما كانت اختلافاتنا : جميعنا تونسيون. 

من ناحية أخرى، جميعنا يعلم أن القران هو كتاب مقدس صالح لجميع العصور، أليس كذلك ؟ إذا كيف يتجرأ بعض الأشخاص من أصحاب الايديولوجيات المتحجرة على تفسير الدين و القران و الشريعة بنفس ماجاء في عصور مغايرة لعصرنا المتقلب. أليس من الحري بنا تفسير ماجاء من بلاغة في قرئاننا بما يستحق ؟

و أنت يا ايها العلماني المتزمت (اتحدث عن من لم يفهم بعد العلمانية الصحيحة) ألا تعرف أن اللائكية تتلخص في جملة واحدة ؟ فصل الدين عن السياسة. أي لا يجب عليك أن تتجاوز هذا المبدأ كما يحجر عليك الدخول في متاهات عدم إحترام حق الأشخاص في ممارسة عقائدية حرة. 

أعود لأذكر أن من يقول أن التونسيون مختلفون، ليس بتونسي و هو يجهل ما يتمتع به هذا البلد الجميل من تسامح. فمبدأ الوسطية يحمي الدين من مفسدة السياسة و ليس العكس. إذا لابد لنا من إحترام الفصل الأول من دستورنا الذي و حسب رأيي الشخصي البسيط، لن يستبدل مهما حدث.

و لأني من أحباء الوسطية فلابد أن أذكر بقولة شخص احترمه رغم أنه ليس بملاك. رجب طيب اردوغان أو الرجل الشجاع حسب اللغة التركية الذي قال عندما تسلم حزبه الحكم : لا نريد دولة دينية...بل دولة حريات دينية. أي أنه ينادي بصوت عقلاني : الدين و العلمانية وجهان لعملة واحدة.

ربما لم اعتد أن اكتب بأسلوب جدي، لأني في كتابتي ابحث عن الطرافة الهادفة أو النقد الغير المباشر. لكن لما يكتسيه هذا الموضوع من أهمية قد أقبل بن أغير حتى أسلوبي لكي أثبت بأن التونسيين إخوة و تقريبا هم متشابهون. لا مانع في الإختلاف الرصين لكن ليس لمجرد الإختلاف، إنما للإرتقاء و الإبتعاد عن الخطاب الأرعن و الغير الموضوعي.

أقولها و أمر... 

عيَّرُونِي بِالمُعَاق وإعَاقَتِي وقَار

قَد مَا عِشت وذُقت العذَاب وقَد مَا قَاسِيت

وفِي صُحِّة رُقعِة هالحكُومة عُمري مَا رِيت

***

يَا سِيدِي رَاهُو عَام وأَنا نِنبَح لِيل مع نهَار وَمَا ملِّيت

من طُلْبِة حَقّ دوَاء الجُرح إلّي منُّو نعَانِي ومَا شفِيت

***

وقت إلّي خرَجت وقَاومت ظُلم الحَاكم وتحدِّيت

وضحِّيت بصحّتي إلّي اليوم شيء منها مَا لقِيت

***

وكِي هرَب الطّاغية، مشَى فِيبَالِي ارتَحت و تهنّيت

وهدِيتلِك الحُرّية إلّي علِيهَا ركبِت وقعَدت وزِدت اتّكِيت

***

جِيتنِي أيَّامات قبَل سُوق الإنتخَابات و التّصوِيت

وبَعثتلِي كَردُونة مقرُونة و معَاهَا دبُّوزة زِيت

***

وزِدت بشّرتنِي بالجنَّة والحُوريَّات وكُلّ مَا تمنِّيت

وغلمَانِك علّقتُولِي تصَاورِي وعلَى أكتاَفهُم تهزِّيت

***

آيَّا خمسَة شُهُور بَعْد أكتُوبِر كَركِرْت رُوحِي ومشِيت

لِقَصبة الخلِيفة وفِي جُرّتِي أمثَالِي ، وزيَارِة مَولَانَا حبِّيت

***

آخِي نَشّ عليَّا القُرُودة و الزّبانيَة متَاع أهْل البِيت

وطَاحُوا يكَسّرُولِي فِالكرُّوسة إلِّي تِهدَاتلِي ومَاخذِيت

***

وسَكّرهَا فِي وجهِي وعَايِرنِي بالإعاقَة إلّي بِيهَا تِبلِيت

وزَاد هَنتِلنِي وطرِّدنِي وبَعثنِي مالثنيّة إلّي مِنهَا جِيت

***

قُلت خُوكُم خلِّينِي نِمشِي نشكِي لزمِيمْ الحقُوق، ومَاظَنِّيت

إنُّو باشْ يَنعتنِي بالسَّارق وطرِيحة نبّاش القُبُور قُدَّامُو كلِيت

***

وولِّيت فِي سبِيطَار "شارل نِيكُول" ساكِنْ وعَاملُو مبِيت

وفِي يدِّي كارطِة "جرِيح الثّورَة" إلِّي جرَايرهَا تهرِّيت وتِعرِّيت

***

هَذا كُفُويَا علَى كُلّ مَا قدَّمت مِن غَالِي و نفِيس وعطِيت

ونِسْتَاهل هَالكفّ إلِّي بِحَرّْ نَارُو البارِدة تِشوِيت وتكوِيت

***

يَا نَاس غَاضِتنِي بِلَادِي إلّي قَد مَا عشقت ترَابهَا و هوِيتْ

وقدّمت عَلَى خاطرهَا للغَاز و الكَرطُوش الحَيّ ومَا رخِّيت

***

تلّفِتْنِي ونسَات قدّاش تِقهرت و تِظلَمت وعَانِيت

وأنَا نلوّج علَى من يِدَاوِينِي زنقَة زنقَة .. بِيت بِيت

[نُشِرَ هذَا المقَال فِي جَريدة "ضدّ السّلطة" (عدد 17، ص.6)]

من ابداعات بطال مترسم

كان جيت مناضل شنية كنت نجم نكون ؟

شغل، حرية، كرامة وطنية.... شعارات نظال ڨديمة ما هاش "أ" لا باج 

مجلس تأسيسي، رئيس مؤقت و رئيس حكومة مسير... ثلاثة عوامل قادرة على تطليع البيكسالات متع التكريز من شاشة الحاسوب الرقمية إلي عندي. بحيث مع مثل هل المونفخات المؤقتة، وليت نوستالجيك و كيما صار للقذافي وليت نتكلم أوهام...الحكاية و ما فيها سؤال كان نرقالو إجابة غدوة نتعدى كي العادة قدام قصر المرزوقي ونعيط : يا مؤقت ! 

السؤال : كان جيت مناضل شنية كنت نجم نكون ؟؟؟؟

نجم ... 

نجم نستغل الأنونيما "anonymat" إلي كنت ناضل بيها في النظام السابق...باش نمد الفاطشة متاعي في أي وسيلة إعلام كان لزم حنبعل...

نجم نبيع روحي و أفكاري باش نحط مخروقتي على كرسي مڨعور و بلاش يدين...

نجم نسيب القضايا الأساسية إلي هاج عليهم الشعب و ندخل في نضال مفتوح عن قضايا مثل الزكاتاكا نتكيفها من غير دراڨا...

نجم نشري شلاكة بوصبع و نولي نسير بها سياسة خارجية...يعن بو الحشومة قدام المجتمع الدولي المنافق...

نجم نزرع زيتونة و كان صبت الشتاء نقول و راس الحنينة مؤامرة... 

نجم نولي وهابي متنكر في شكل سلفي صاحب ولد المنصف بن سالم...باش كي ندنس علم يعملولي إستقبال في الخسة متع باردو... 

نجم كي يسبني عبد نرد عليه و تركبلي نعمل تويت على العصفور ولى ستاتو على فايسبوك...و هكاكة نطيح في الفخ و في البرفكاسيون...

وكان جيت مناضل بالحق كيما حمى الهمامي راهم اتهموني بتدنيس المصحف الشريف و إنتهاك حرمة المسجد ...

ماو هكة النضال !! السماح فأنا لست مناضلاً ولن أكون ما لست عليه !!!

نجم نكون صحيح ما كانش راهم غلطوني ولى البوليس السياسي جبد دوسيياتي و فضحني...  

baba 3zizi 2.0

ما بين الكلاصد و الصباط ثمة البوشلاكة

ما أروعك يا مؤقت 

ما أحلى أن تسمع سيادته...من ؟ رئيس الجمهورية المؤقت يعطي أخطر نظرية يشهدها القرن الحادي و العشرين. فبعد النظرية الأعجوبة التي تتحدث عن الإسهال و طرق علاجه، المؤقت الأول في تونس يعطي مثال في أفضل مقارنة بين وضع تونس و وضع الصباط إلي من غير كلاصد أو الساڨ الحفيانة إلي تلوج على الصباط.

التحليل واجب و ظروري يا مؤقت 

باهي خنحطوا لومور في إطارها... ويحك يا مؤقت !! ياخي كيفاش عملت الانتقال الديمقراطي من الإسهال إلى نظرية الصباط و الكلاصد ؟ ألم تلحظ انو فما تناقض في لبسان الكلاصد قبل أو الصباط قبل ؟ 

شكلك متحشالك يا مؤقت. أما بما انك عينتني مستشار لك في الرئاسة غير متحدث بإسمك خاطر ما تمثلنيش، باش نخرجك من المشكل إلي حطيت فيه روحك. بما أنك نسيت يا مؤقت إلي حتى في حالة كان باش تلبس الحفيان صباط أقرا حسابك بعد ما يلبسو باش يقولك جيبلي كلاصد وكورنو... لا الريحة تسرح كيما سرحت في المجلس التأسيسي . فبحيث و بعيداً عن نظرية الاسهال، تحليلك موش لوجيك... فنقترح عليك حل جذري لا يمت بصلة للجرذان... إستعمال البوشلاكة !!

البوشلاكة التي أبكت الملايين

أسهل و أقرب حل للمؤقتين هي البوشلاكة... و ماتخافش على الأكتاف عندك شيخ يفديك و خارجية تحميك...و بذلك ترضي الزوالي البوهالي و المثري أبو ثراء...

نجم نكون صحيح ما كانش راهم غلطوني أو حرت بين الشلاكة و الصباط ...

نهار عصيدة في قصر المرزوقي

المرزوقي بعد الاندماج مع الخليفة الجبالي ... ثم أجهش بنفاق المتسلسل 

في يوم من أيام الشتاء الحالكة، حلوكة مستقبل تونس، و عندما كنت أهم بفتح حسابي الفايسبوكي، إذا بالهاتف يرن... اه نارك !! أنه رئيس الجمهورية المؤقت يدعوني إلى قصره...من وهل الصدمة المؤقتة لبست جرودي و عراقيتي التي لا استغني عنها كا لحيتي و خرجت.

في الباب اصطدمت بزوز عرص في شكل إنسان...من غير اسئلة طلعت في كرهبة كحلة و فهمت الحكاية. في الطريق السالك على الاخر كي طريق حركة النهضة، حاولت باش ندخل الزوز العرص في الجو ...فطرحت سؤال :

أنا : - شنية عامل معاكم المرزوقي تاكلوا مليح ؟ مشيخكم ؟

فإطرشقت العرصاتان بالضحك المتواصل عندها فهمت أنهم من أمن الدولة...خفت لا تتدبسلي في قضية و إلا يبزكوهالي و نولي أنا هربت بن علي فبلعت فوراً.

في قصر المرزوقي، استقبلني المؤقت بطلته البهية البرنوصية...وفي حركة متع انسان موش مستانس دخل يوري فيا في صلاحياتو و التي كما يلي :

-يلبس البرنوس و ينحيه

-التجول في القصر جيئتاً و ذهاباً

-يكونكتي و يسكر الفيسبوك وساعات عندو الحق يكحل على التويتر

-يقابل رؤساء و بعثات دول...فو بروفيل

-يجبد... (يعجز لساني على وصف الصلاحية) 

-ألخ ألخ من الصلاحيات الهايلة التي لا نهاية لها و القادرة على حل أزمة الثلج في تونس ...

و بعد هذه الجولة من الصلاحيات التي لا نهاية لها ... توجهت إلى المؤقت بسؤال خفيف :

أنا : - إي سيدي الرئيس المؤقت...ماقتليش علاش عيطلي...فما ورطة ؟

المرزوقي : - بجاه السماء ماعاتش تقلي مؤقت !! (و قام بسلسلة من التربريبات المؤقتة )

أنا : - يا سيدي الرئيس المؤقت راك البارح تصلي بالبشرية صلاة المولد.

المرزوقي : - تي برى ... (يعجز اللسان عن ذكر الباقي)

أنا : - يا مؤقت علاش جابتني ؟ باش تمارس صلاحياتك على مازمبي (في نبرة من التحدي قائلاً في قلبي يرحم أيماتك يا المبزع )

المرزوقي : - من الاخر إنت مڨلڨني في أم جميع شبكات التراحم ... فقررت نعينك متحدث بأسمي... تعملي اشهار على صلاحياتي نحبك كوموينيتي مانجر ( قالها بنبرة متع حزن و فشل وشلل)

هههعهه الرئيس المؤقت وقع في الفخ !! في إجابة سريعة متاع شيخ ماكر و طحان كبير قتلو :

أنا : - ياخي شاورت رئيس حكومة مازمبي...حمادي الجبالي ؟ (الوريث الوحيد للعرش بعد محمد الجبالي... خليني بجنبك

وفي حالة هستيرية إطرشق بالضحك...ليجهش بعد ذلك بالعويل و النواح الشديد على سعده الراقد و برنوسه البالي....

ومن دون الإجابة على سؤالي أكلنا العصيدة بنهم و ترحمنا على شهداء تالة و الڨصرين و بسنا التراب إلي يمشي عليه عصام جمعة ونسور قرطاج...

مغزى القصة : " راجل بلا برنوس...راجل بلاش حياتهْ...البرد ڨتلهْ... و المطر بلاتهْ... " قالها المؤقت 

نجم نكون صحيح ما كانش راني مؤقت...

baba 3zizi 2.0

رسالة نهضاوي : لهذا اخترت النهضة !

صدقت يا فتى...زيد حل فلسة من السورية 

: على لسان نهضاوي

: توطئة

حتى أنا نهضاوي ! وعلى الجميع أن ينهضوا كيما نهضت أنا بعد ما عرفت إلي نهضة النهضة منهوضة بعد ما كانت مغبونة في عهد المنهوض به بن علي و عليه فإن النهوض بما هو غير منهوض هو إختصاص النهضاوي القادر على إحداث نهضة دايخة. كل هذه العوامل خلاتني بكل فخر نحس إلي برنامج "حتى أنا نهضاوي" قريبلي و ...

  .مع أفكاري Ami en Commun

: : الجوهر  البداية بوضع هاش تاغ  

 #EnnahdhaChoice #Twitter

...اخترت النهضة

...لأن النهضاوي بريء من مهزلة 1987 و التحول المبارك

"لأن الحركة طلعت ضبعة بعد ما فاقت بالعفسة المفخخة متع بن علي متع عام 1989 كان كي قالت "لقد وقعنا في الفخ

...لأن الحركة طيلة 23 سنة عاشتهم في الحبوسات...و بعد سنوات نضال متواصل... والات تشبرش علينا

...لأن الحركة شاركت في "الثورة" مشاركة فعالة...ياسر حب للوطن

...خاطر الحلال والحرام النهضاوي ماركة مسجلة تابعة لمعمل النهضة الإلكتروني الفايسبوكي و إلي عينت على رأسو مجموعة من الأدمينات أمثال : أمان الله 2.0 - ريكوبا الظلامي و هلم جر...

خاطر إلي جاي ما يبشرش بالخير ملي جات أضعف حكومة من العصور المتحجرة، فرطت في العذرية متع تونس لبلدان معاهدة سايسبيكو

ملاحظة : ما هو تاريخ هاته الدويلات حتى تنتهك عذرية البلاد التونسية ؟ إن كنت ناسي افكرك !

...خاطر الحركة قاعدة تضيعلنا في وقتنا ما دامها ما فهمتش إلي تونس مشكلتها إقتصادية وموش دينية

: الخاتمة 

.مع كل هاته الأسباب التي لا تعبر عن فشل الحركة...فإنها تواصل إستغلال الثورة الوهمية للوصول للقلوب البسيطة

.شكراً نهضتي يا نهضتي على نجاح برنامج حتى أنا نهضاوي

...أنشرها و لك الأجر فإن لم تنشرها فانتظر خبر هجوم السلفيين عليك و أنت نائم فتستفيق لتجد أنه ليس حلما 

...نجم نكون صحيح ما كانش راني طلعت حتى أنا نهضاوي و لحيتي ولات تلعب تحت الحزام

baba 3zizi 2.0